Бухорода 8793 нафар алимент тўловчи қарздорнинг республика ҳудудидан четга чиқиши вақтинча чекланди. Бу ҳақда «Дарё»га вилоят ҳокими ахборот хизмати раҳбари Олим Жўраев маълум қилди.
Таъкидланишича, вилоятда алимент ундируви билан боғлиқ ҳолатлар жуда кўп. 19371 та ижро ҳужжатидан 4191 тасининг ижроси якунланган. 3716 та иш бўйича қарздор доимий иш ўринига эга бўлганлиги учун ундирув уларнинг иш ҳақига қаратилган. 4381 нафар қарздор ва уларнинг яқин қариндошлари томонидан алимент пуллари ихтиёрий тўланаётган бўлса, 5680 нафар қарздордан давлат ижрочиларининг аралашуви билан ундирилмоқда.
Бугунги кунда 514 нафар қарздордан уларнинг ночорлиги, доимий яшаш жойига эга эмаслиги, айримларининг қидирувда бўлгани, алимент пулларини тўлашдан қасддан бўйин товлаб келаётгани ва бошқа сабабларга кўра, алимент ундирилмаган. Президентнинг 2020 йил 24 ноябрдаги «Суд ҳужжатлари ва бошқа органлар ҳужжатларини ижро этиш тизимини янада такомиллаштириш чора-тадбирлари тўғрисида»ги фармонига мувофиқ, она ва бола ҳуқуқларини ҳимоя қилиш борасидаги ишларни янада адолатли тарзда қатъий ташкил этишни йўлга қўйдик. Вилоятда мажбурий ижро ҳаракатлари давомида алиментдан қарзи бўлган ва узрсиз сабабларга кўра тўламасдан келган 8793 нафар алимент тўловчи қарздорларнинг республика ҳудудидан четга чиқиши вақтинча чекланди.Билдирилишича, ҳудудий бўлимлар ижро иш юритувида мавжуд бўлган 636 та ижро ҳужжати бўйича ҳам ойлик ундирувлар таъминланмаган. Икки ойдан ортиқ алимент тўлашдан бўйин товлаган 375 нафар қарздорга нисбатан эса Маъмурий жавобгарлик тўғрисидаги кодексга кўра ҳуқуқбузарлиги учун Маъмурий судларга юборилган. Шундан 275 та қарздорга нисбатан маъмурий қамоқ жазоси тайинланган.Алижон Қиличев, Мажбурий ижро бюроси Бухоро вилояти бошқармаси бошлиғи
Изоҳ (0)