Бухоро вилоятининг Қоракўл туманида қўшнисининг ертўласидан 6 миллион сўм пулни ўғирлаган 22 ёшли фуқаро қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Қоракўл тумани «Дарғали» маҳалла фуқаролар йиғинидаги Оқработ қишлоғида яшовчи фуқаро Н.О. туман ИИБга мурожаат қилиб, номаълум шахс томонидан уйининг ертўласида жамғариб келаётган 6 миллион сўм миқдоридаги пуллари ўғирланганини билдирган.
Ариза асосида туман ИИБ томонидан тезкор-суриштирув ҳаракатлари олиб борилган.
Қоракўл туман ИИБ ЭКБ лейтенанти Алишер Назаровга кўра, воқеа жойи синчковлик билан кўздан кечирилиб, қўл бармоқ излари олинган. Қўл бармоқ излари ашёвий далил сифатида вилоят ИИБ эксперт-криминалистика бўлимига юборилган. Мазкур бўлимда мавжуд шахсни автоматлаштирилган дектолоскопик-идентификацион тизими орқали текширув ўтказилган ва ўғрилик жиноятини жабрланувчининг қўшниси бўлган 22 ёшли Ф.Б. содир этгани аниқланган.
«Қўшнимнинг яхши ният билан пул жамғариб юрганидан хабардор эдим. Кейин осон йўл билан унга эга чиқиш режасини туздим. Кечки пайтда бу пулни қўлга киритиб, ўз ҳовлимиздаги сомонхонага беркитиб қўйдим. Қилган ишимдан пушаймонман»,— деди ўғрилик содир этган Ф.Б. «Дарғали»да маҳалла фаоллари билан ўтказилган учрашувда.
Аризачига тегишли бўлган пуллар расмийлаштириб, қайтариб берилган. Фуқаро Ф.Б.га нисбатан эса Жиноят кодексининг 169-моддаси 2-қисми, «г» банди (ўғрилик) билан жиноят иши қўзғатилган.
Изоҳ (0)