WP: Трампнинг сайловлар ҳақидаги баёнотлари ва 6 январдаги тартибсизликлар АҚШ ғазнасига 519 млн долларга тушган

АҚШ президенти Дональд Трампнинг ноябрдаги сайловлар ҳақидаги баёнотлари АҚШ ғазнасига 519 миллион долларга тушди, деб ёзади «Коммерсантъ» The Washington Post ҳисоб-китобларига таяниб.

Ушбу баёнотлар миллионлаб америкаликларни чалғитиб, сайлов тизимига бўлган ишончни барбод қилди, тартибсизликларни келтириб чиқарди, энди эса солиқ тўловчилар буларнинг барчаси учун тўлашига тўғри келяпти, деб ёзади WP.

Харажатлар кундан кунга ўсиб борган, чунки барча даражалардаги ҳукумат идоралари Трамп ва унинг тарафдорлари томонидан амалга оширилган хатти-ҳаракатларга жавоб бериш учун маблағ ажратишга мажбур бўлган. Чиқимлар ўнлаб суд даъволари сабабли келиб чиққан суд харажатларини, сайлов участкалари ходимларига қаратилган таҳдидларга жавобан хавфсизликнинг кучайтирилишини ҳамда Капитолийдаги тартибсизликлардан кейинги таъмирлаш ишларини ўз ичига олади. Шулар туфайли Вашингтон кўчаларига минглаб Миллий гвардия аскарлари чиқди, бу ҳам катта харажатларга сабаб бўлди.

Умумий қийматнинг 480 миллион доллардан ортиғи Қуролли кучларнинг ўз қўшинларини март ўрталаригача Вашингтонга жойлаштиришига кетадиган харажатлардир. Шу билан бирга, президентнинг сайловларни тан олишдан бош тортишининг молиявий оқибатлари шу пайтгача расмийлаштирилганидан анча каттароқ бўлиши ва ҳақиқий чиқимлар номаълум қолиши мумкин.

Эслатиб ўтамиз, 6 январь куни собиқ президент Дональд Трампнинг тарафдорлари Конгресс Жо Байденнинг президент сайловидаги ғалабасини тасдиқлаётган пайтда Капитолийга бостириб кирган эди. Мажлис тўхтатилган, аммо 7 январь куни конгрессменлар Жо Байденнинг ғалабасини тасдиқлаган эди.