Эронда Россиянинг «Спутник V» вакцинаси билан эмлаш 9 февраль куни бошланади. «Интерфакс»нинг хабар беришича, бу ҳақда мамлакат соғлиқни сақлаш вазири Сейид Намаки маълум қилди.
Унинг таъкидлашича, биринчи навбатда интенсив терапия бўлими тиббиёт ходимлари эмланади.
IRNA агентлигининг маълум қилишича, энг ишончли вакциналар текширувидан сўнг, Эрон энг хавфсиз препаратлардан бирини танлаб, импорт қилган.
«Спутник V» вакцинасининг биринчи партияси ортилган самолёт 4 февраль куни Теҳронга етиб келган. Мамлакатга, шунингдек, февраль ойида 4,2 миллион доза AstraZeneca вакцинаси етказиб берилиши кутилмоқда.
Декабрь ойида Эрон ўзининг Razi Cov Pars вакцинасини клиник синовларидан ўтказишни бошлаган. Эрон президенти Ҳасан Руҳонийнинг айтишича, ушбу препарат ёзнинг бошларида фойдаланишга топширилиши мумкин.
Жонс Ҳопкинс маълумотларига кўра, Эронда пандемия бошланганидан бери 1,4 миллиондан ортиқ коронавирусга чалиниш ҳолатлари аниқланган, беморларнинг 58,4 мингдан ортиғи вафот этган.
Эслатиб ўтамиз, Эрон январь ойининг охирида Россиянинг «Спутник V» вакцинасини рўйхатдан ўтказган.
Изоҳ (0)