7 февраль куни Германия ҳукумати кучли қор ёғиши туфайли Нидерландия билан ўта тезюрар Intercity (ICE) поездлар қатновини бекор қилишга мажбур бўлди, деб ёзади «РБК».
Поездлар ҳаракатини тўхтатишдан ташқари, қор ёғиши яна бир қанча ҳодисаларга ҳам сабабчи бўлди. Шимолий Рейн-Вестфалия штатининг ўзида ноқулай об-ҳаво туфайли 222 та йўл-транспорт ҳодисаси юз берди. Уларда 28 киши жабрланди. ОАВларга кўра, ҳодисалар оқибатида етган зарар тахминан 1 миллион еврога баҳоланмоқда.
Ноқулай об-ҳаво 7 февраль, якшанба куни ўтказилиши керак бўлган Бундеслига ва Иккинчи Бундеслиганинг бир қатор мусобақалари бекор қилинишига ҳам сабабчи бўлди.
Кучли қор ёғиши ва қор бўронлари 7 февраль куни Нидерландияда ҳам транспорт ҳаракатини тўхтатиб қўйди — аэропортларда рейслар бекор қилинди, поездлар ҳаракати тўхтади, жамоат транспорти ҳаракатида жиддий муаммолар кузатилмоқда. Транспорт ҳаракати қачон қайта тикланиши аниқ эмас.
Нидерландия метеорология хизмати хабар беришича, 7 февралга ўтар кечаси ёғган кучли қор ўн йил ичида биринчи марта кузатилган. Сўнгги марта бундай ҳолат 2010 йил январида кузатилган. Метеохизмат бутун мамлакат ҳудудида қизил (максимал) тревогани эълон қилди. Маълум қилинишича, қаҳратонда шамол тезлиги соатига 90 километрга етиши мумкин.
Нидерландия ҳудудининг катта қисмида 5—10 см, баъзи жойларда эса 30 см қалинликда қор ёғган. NS темир йўл операторининг хабар қилишича, Нидерландияда поездлар камида 8 февраль, душанба куни тушгача бекор қилинган.
Айни пайтда совуқ фронт Буюк Британияга қараб йўл олмоқда, мамлакат ноқулай об-ҳавога тайёрланмоқда.
Изоҳ (0)