Дунё бўйича коронавирус юқтириб олганлар сони 105 млн кишидан ошди

Дунёда коронавирусга чалинганлар сони 105 806 715 кишига етди. Бу ҳақда Американинг Жонс Ҳопкинс университети маълумотлари гувоҳлик бермоқда.

Бутун дунёда COVID-19’дан вафот этганлар сони 2 миллион 310 минг 569 кишини ташкил қилмоқда, 76 миллиондан зиёд киши касалликдан тузалди.

5 миллион ва ундан ортиқ касалланиш ҳолатлари қайд этилган мамлакатлар учлигини ҳамон АҚШ, Ҳиндистон, Бразилия ташкил қилмоқда.

Биринчи ўринда АҚШ қарийб 27 миллионта COVID-19’га чалиниш ҳолатлари билан бормоқда. 460 мингдан ортиқ ўлим ҳолати қайд этилган, 17 миллиондан зиёд киши соғайган.

Касалланганлар сони бўйича Ҳиндистон иккинчи ўринда, у ерда 10,8 миллиондан ортиқ одам касалликни юқтирган, шулардан 155 минги вафот этган, 10,5 миллиондан зиёди соғайган.

Коронавирусни юқтирганлар сони бўйича Бразилия учинчи ўринда бўлиб, бутун пандемия даврида 9,5 миллионга яқин одам касалланган, 230 мингдан ортиғи вафот этган, 8,3 миллиондан кўпи соғайган.

Маълумот учун, дунё бўйлаб вирусга чалинганларнинг умумий сони 17 декабрь куни 74 миллион, 27 декабрь куни 80 миллион, 4 январь куни 85 миллион, 11 январь куни 90 миллион, 18 январь куни 95 миллион, 27 январь куни 100 миллиондан ошганди.

Эслатиб ўтамиз, дунё бўйича COVID-19’га чалинганлар сони 100 миллиондан ошгани ҳақида 27 январь куни маълум бўлган бўлса, 2 февраль куни унга қарши эмланганлар сони 100 миллионлик маррадан ўтган эди. 3 февраль куни эса бутун дунё бўйлаб коронавирусга қарши эмланганлар сони биринчи марта ушбу вирусга чалинганлар сонидан ошди.