Сенат Ҳалилилло Тўрахўжаевни Олий суд раиси ўринбосарлигига тасдиқлади

Парламент юқори палатасининг ўн иккинчи ялпи мажлисида сенаторлар Ҳалилилло Тўрахўжаевни Олий суд раисининг ўринбосари — фуқаролик ишлари бўйича судлов ҳайъати раиси лавозимига сайлаш тўғрисида қарор қабул қилди.

Шунингдек, мазкур қарор билан Луқмон Қодиров, Талъатжон Мелибоев ва Абдурасул Эранов бошқа ишга ўтгани муносабати билан Ўзбекистон Олий судининг судьяси лавозимидан озод этилди.

Эслатиб ўтамиз, 2021 йил 15 январь куни Ҳалилилло Тўрахўжаев Олий суд раисининг ўринбосари — фуқаролик ишлари бўйича судлов ҳайъати раиси лавозимига тайинланганди.

У 2020 йилнинг сентябрь ойидан буён Давлат солиқ қўмитаси раисининг биринчи ўринбосари — Давлат солиқ қўмитаси ҳузуридаги Кадастр агентлиги директори лавозимида, ундан аввал эса Адлия вазирлиги ҳузуридаги Давлат хизматлари агентлиги раҳбари лавозимида ишлаб келган.