Алексей Навальнийнинг веб-сайтида ва ижтимоий тармоқларда унинг тарафдорларига мурожаатлари пайдо бўлди. Бу суд томонидан унинг «Ив Роше» ишидаги шартли жазосини ҳақиқий жазо билан алмаштиргандан сўнг, сиёсатчи томонидан эълон қилинган биринчи мурожаати, дея хабар бермоқда Meduza.
«Мен, албатта, қуйидаги иборани кўп марта эшитганман: ‘Ичкарида эркин бўлган одамни эркинликдан маҳрум қилиш мумкин эмас’. Ва энди мен ўзимдан сўраяпман: Хўш, қандай бўляпти? Ишонинг, (менда) айнан шундай бўляпти. Менинг орқамдан темир эшиклар ёпилди, лекин мен ўзимни эркин одамдек ҳис қиляпман. Сиз ўзингизнинг ҳақ эканингизга бўлган ишончингиз сабабли шундай бўляпти. Қўллаб-қувватлов учун ташаккур. Оилангиз кўмаги учун ташаккур», – дейди Навальний.
Навальний унга қарши «намойишкорона қонунбузарлик» бу президент Владимир Путиннинг шахсий қасоси, шунингдек, бутун мамлакатни қўрқитишга уриниши, деган фикрни билдирди. Навальний ўз тарафдорларини қўрқмасликка чақирди.
«Куч ва қаттиққўллик иллюзиясидан алданманг. Агар улар одамларни яширинча заҳарлаши ва ноқонуний равишда қамоққа ташлаши мумкин бўлса, бу қандай куч? Агар мустақил номзодлар ўзининг номзодини қўйишига йўл қўймаслик орқали сайловларда ғалаба қозонишса ва намойишчиларни қўрқитиб, метро станцияларини ёпишса, улар бутун мамлакат бўйлаб қўллаб-қувватланишга лойиқми?
Сиёсатчи руслар «ўз ватанларини бир қанча босқинчи ўғриларидан озод қилиши» мумкинлигига ишонч билдирди ва буни қилиш шартлигини таъкидлади. «Эркингизни йўқотманг», – дея мурожаатини якунлаган Навальний.
Алексей Навальний 2020 йил августдан бери Германияда эди. У Томск—Москва самолётида ўзини ёмон ҳис қилгани сабабли даволаниш учун олиб кетилган. Таҳлиллар натижасига кўра, Навальний «Новичок» гуруҳидаги модда билан заҳарлангани маълум бўлди. Декабрь ойида Bellingcat ва The Insider сиёсатчини Федерал хавфсизлик хизматининг саккиз нафар ходимидан иборат махсус гуруҳ заҳарлагани таъкидланган текширув натижаларини эълон қилди.
Навальний 17 январь куни кечқурун Берлиндан Москвага қайтиб келди. Шереметьево аэропортида сиёсатчи «Ив Роше» иши доирасида ҳибсга олинди ва Химки шаҳридаги полиция бўлимига олиб кетилди. Химки шаҳар суди Алексей Навальнийни 15 февралга қадар қамоққа олиш бўйича ҳукм чиқарган.
28 январь куни Москва вилоят суди Алексей Навальнийнинг адвокатлари томонидан сиёсатчининг Москвадаги «Матросская тишина» номли тергов изоляторидан озод қилинишини талаб қилган апелляция шикоятини рад этган. Учрашув давомида Навальний тергов изоляторидан видеоалоқа орқали нутқ сўзлаган.
2 февраль куни суд Навальнийга «Ив Роше» иши бўйича берилган шартли муддатни ҳақиқийсига алмаштирди ва 2 йил-у 8 ой колония тайинлади. Ғарб мамлакатлари сиёсатчини озод этишни талаб қилди. Москва ва Петербургда уни қўллаб-қувватлаб акциялар ўтказилди. Москванинг ўзида намойишчиларга қарши 8 мингдан ортиқ полициячилар ва гвардиячилар жалб қилинди. Улар бир ярим минг кишини ҳибсга олди.
Изоҳ (0)