Сомалида чўл чигирткаларининг ҳужуми туфайли фавқулодда ҳолат эълон қилинди. Бу ҳақда маҳаллий Garowе нашри хабар тарқатган.
Фавқулодда ҳолат Сомали қишлоқ хўжалиги вазирлиги томонидан эълон қилинган, мамлакатнинг жанубий ҳудудларида бу борадаги вазият анча оғирлашгани қайд этилган.
БМТнинг Ишлаб чиқариш ва қишлоқ хўжалиги ташкилоти (FАО) шамол ҳамда ёмғир чўл чигирткаларининг кўпайиши учун шароит яратилишига туртки бериши ҳақида огоҳлантирган.
«Ҳашаротлар тезда кўпайиб янги ҳудудларни эгаллаб олмоқда, оқибатда қишлоқ хўжалиги маҳсулотлари катта хавф остида қолиб кетади», – дейилган ташкилотнинг баёнотида.
Чўл чигирткаси ушбу оилага мансуб ҳашаротлар ичида энг катта хавф келтирувчи зараркунанда ҳисобланади. Ҳашаротлар тўдаси бир сутка ичида 150 километр масофани босиб ўтади ва йўлида учраган ҳамма нарсани еб битиради.
Бир йил аввал январь—февраль ойларида Африкада чигирткаларнинг охирги 25 йил ичидаги энг катта ҳужуми кузатилганди. Ўшанда ҳужумларга қарши туриш ва зараркунандаларни йўқ қилиш учун ҳавога пецицидлар, яъни заҳарли кимёвий моддалар сепилганди.
2020 йил декабрь ойида Япониянинг Ўрта Осиё мамлакатлари ва Афғонистонга чигирткадан ҳимояланиш мақсадида 7,5 миллион доллар ажратиши хабар қилинганди.
Изоҳ (0)