Видео: Саудия Арабистонида қурилаётган дунёдаги энг баланд, энг узун ва энг тез «Америка тепаликлари» аттракциони

Саудия Арабистонида дунёдаги энг баланд, энг тез ва энг узун бўлган «Америка тепаликлари» аттракциони қурилмоқда, дея хабар бермоқда Unilad.

Хабар беришларича, аттракцион лойиҳаси Швейцариянинг Intamin инжиниринг компанияси томонидан ишлаб чиқилган бўлиб, у дунёдаги етакчи кўнгилочар боғлар учун ускуналар ишлаб чиқарувчиларидан бири ҳисобланади.

Falcon’s Flight деб номланган аттракцион узунлиги тўрт километрни ташкил этиб, дунёдаги энг узун аттракцион ҳисобланади, у соатига 250 километргача тезликка эришади. Аттракцион 200 метр баландликка кўтарилади ва у ердан 160 метр пастга тушади.

Махсус магнит мослама йўловчиларни 200 метр баландликка кўтаришга ёрдам беради, кейин улар 90 даража бурчак остида пастга тушади. «Саёҳат» атиги уч дақиқа давом этади.

«Биз аввал қилмаган ишимизни қилишни истаймиз. Айни пайтда янги боғимиз барча рекордларни янгилайдиганга ўхшайди», – деди Қиддия бош директори Филипп Гус.

Истироҳат боғи 32 гектар майдонни эгаллайди ва 28 та «Америка тепаликлари» ҳамда бошқа аттракционлардан иборат бўлади. Боғ олтита тематик зоналарга бўлинади. Қурилиш 2018 йил апрель ойида бошланган ва 2023 йилда очилиши режалаштирилган.