Беларусь президентлигига номзодини қўйгандан сўнг қамоққа олинган Виктор Бабарико устидан 17 февралда суд иши бошланади

17 февраль куни Беларусь Олий суди 2020 йил ёзида бўлиб ўтган президентлик сайловларида қатнашган «Белгазпромбанк»нинг собиқ раиси Виктор Бабарикога нисбатан жиноят ишини кўриб чиқишни бошлайди. Бу ҳақда «Интерфакс» хабар берди.

Қайд этилишича, жиноят иши Олий судга январь ойида келиб тушган. 4 февраль куни суд иши доирасида дастлабки йиғилиш бўлиб ўтган.

Аввалроқ олтита айбланувчи билан судгача ҳамкорлик келишувларни имзоланган. Бабарико — айбини тан олишни хоҳламаган ягона шахс.

Мамлакат Бош прокуратураси маълумотига кўра, «Белгазпромбанк» бошқарувининг олти нафар собиқ ўринбосарларига уюшган гуруҳ томонидан йирик миқдордаги пора олиш айблови эълон қилинган. Тергов маълумотларига кўра, банк мижози — «Активлизинг» таъсисчиларидан бири ва унинг эгаси банк ходимларига камида 2,476 миллион доллар миқдорида пора берган.

Тергов департаменти Бабарико «Белгазпромбанк» бошқарув кенгаши раиси сифатида мунтазам равишда бизнесдан пора олиш мақсадида «ўз ўринбосарларидан ташкил топган уюшган гуруҳ тузган», деб ҳисоблайди. Банкнинг топ-менежерлари 2004 йил бошидан 2020 йил июнь ойининг ўрталарига қадар бир қатор корпоратив мижозлардан деярли 30,5 миллион Беларусь рубли (ҳозирги курс бўйича 11,5 миллион доллардан ортиқ) миқдорида пора олган, деб таъкидламоқда Бош прокуратура.

Бундан ташқари, Бабарико 2018 йил 10 ноябрдан 27 декабргача олинган пулни легаллаштириш учун Минскда 1 миллион рублдан ортиқ нархда иккита бино сотиб олганлиги учун айбланмоқда.

Виктор Бабарико 2000 йил июлдан 2020 йил 12 майгача «Белгазпромбанк» бошқарув кенгаши раиси бўлган. 2020 йил баҳорида у президент сайловларига қатнашишга қарор қилган. 18 июнь куни ушланиб, ҳибсга олинган. Унга нисбатан Жиноят кодексининг учта моддаси: пул ювиш, солиқларни четлаб ўтиш ва пора олиш жиноятлари бўйича айбловлар эълон қилинган.

19 июнда бош прокурор Александр Конюк «Белгазпромбанк» иши қатнашчилари мамлакат миллий хавфсизлиги манфаатларига иқтисодий ҳамда бошқа соҳалар бўйича ҳам зарар етказганини таъкидлаган.

Шунингдек, шу куни Беларусдаги инсон ҳуқуқлари ҳимоячилари Бабарикони сиёсий маҳбус деб топган. Евроиттифоқ Беларусь ҳукуматидан Бабарикони озод қилишни сўраган. 30 июнда Минск марказий туман суди Бабариконинг шикоятини кўриб чиқиб, уни гаров эвазига озод қилишни рад этган.