АҚШнинг Айдаҳо шаҳрида UH-60 Black Hawk вертолётининг қулаши оқибатида уч ҳарбий учувчи ҳалок бўлди. Бу ҳақда штат Миллий гвардиясига таяниб, «Korrespondent.net» хабар қилди.
«Айдаҳо Миллий гвардиясининг уч аъзоси 2 февраль куни UH-60 Black Hawk вертолёти жанубий Лаки-Пикда қулаб тушганидан сўнг вафот этди. Бортдаги бу уч зобит одатий ўқув парвозининг учувчилари эди», – дейилади хабарда.
Штат Миллий гвардияси подполковниги Кристофер Бордерснинг таъкидлашича, ҳалокат юз берган жойда қор ёғган.
«Бу бизга вертолётни излашга халақит берди», – деди Бордерс АBC телеканалига.
Ҳалокатга учраган Black Hawk ва экипаж жасадлари ярим тундан кўп ўтмай топилган. Авиаҳалокат ҳақидаги бошқа тафсилотлар ҳали ошкор этилмаган.
Аввалроқ Туркманистон президенти Гурбангули Бердимуҳамедов вертолёт қулаши сабаб чегара хизмати бошлиғини ишдан бўшатгани, Францияда бортида олти киши бўлган вертолёт ҳалокатга учрагани ҳамда Афғонистонда иккита ҳарбий вертолёт тўқнашуви оқибатида 15 киши ҳалок бўлгани ҳақида хабар берилганди.
Изоҳ (0)