Европа Иттифоқи кенгаши пандемия юзасидан Шенген ҳудудига кириш чекловлари бўйича янги тавсияларни маъқуллади. Янги чекловлар 2 февраль куни ёзма тартибда қабул қилинди, деб ёзмоқда «Korrespondent.net».
Хусусан, тавсиялар ЕИнинг учинчи мамлакатлар билан чегараларини ҳар қандай ташриф, шу жумладан, сайёҳлик учун очишига оид янги шартларни назарда тутади. Бунинг учун мамлакат қуйидаги мезонларга жавоб бериши керак:
- сўнгги 14 кун ичида инфекция юқтириш ҳолатлари сони ҳар 100 минг аҳолига 25 тадан ошмаслиги керак;
- сўнгги икки ҳафта ичида янги юқтиришлар сони камайиши ёки олдинги 14 кунлик даврга нисбатан барқарор туриши керак;
- мамлакат етти кун давомида ҳар 100 минг аҳолида 300 дан ортиқ тест ўтказиши керак;
- сўнгги етти кун ичида COVID-19 тестининг ижобий натижалари сони 4 фоиздан ошмаслиги керак.
Мазкур мезонларга асосланиб, ЕИ кенгаши томонидан фуқаролари учун Шенген ҳудуди чегаралари очиқ бўлган давлатлар рўйхати янгиланади. Рўйхат охирги марта 2021 йилнинг 28 январида қайта кўриб чиқилган. Унда фақат еттита мамлакат қолганди: Австралия, Янги Зеландия, Руанда, Сингапур, Жанубий Корея, Таиланд ва Хитой.
Европа Иттифоқига уюштириладиган зарурий ташриф учун қўшимча чекловлар:
ЕИ ҳудудига зарурий ташриф учун рухсат бериш ҳолати амалда қолади. Аниқроқ айтганда, ЕИ мамлакатларининг фуқаро ва резидентлари, шунингдек, транспорт ходимлари ёки дипломатларнинг Шенген ҳудудига кириши учун рухсат берилади.
Аммо эндиликда бунинг учун Шенгенга киришдан 72 соат олдин амалга оширилган ПЗР тестининг салбий натижаси тўғрисида ҳужжат талаб қилинади. Ушбу қоида нафақат транспорт ходимларига тегишли, бундан ташқари, мамлакатлар ўз хоҳишига кўра, ташриф буюрувчиларга қўшимча чекловларни — карантин, ўз-ўзини изоляция қилиш ёки коронавирус учун қўшимча тест чораларини киритади.
Тавсиялар, шунингдек, зарурий ташриф ҳуқуқига эга кишилар тоифасини қисқартириш имкониятини ҳам назарда тутади. Бу коронавируснинг янги турлари тарқалиши оқибатида эпидемиологик вазият тобора ёмонлашаётган учинчи мамлакатларга нисбатан қўлланилади.
Чегарадан ўтиш масалалари бўйича ЕИнинг ҳар бир давлати алоҳида ваколатга эгалиги учун юқоридаги қоидалар тавсия шаклида қабул қилинган. Уларнинг ижроси мамлакатлар миллий ҳукуматининг зиммасида бўлади. Бироқ мазкур тавсияларни ЕИ давлатлари биргаликда қабул қилгани сабабли уларнинг амалга оширилиши кутилмоқда.
Ушбу кўрсатмалар Ирландиядан ташқари ЕИнинг барча мамлакатларига, шунингдек, Швейцария, Норвегия, Исландия ва Лихтенштейнга тегишли. Дания уларга риоя қилиш ёки қилмаслик тўғрисида ўзи қарор қабул қилиш ҳуқуқига эга.
Изоҳ (0)