Хитойнинг интернет-гиганти Tencent Holdings Ltd. коррупцияда гумон қилинган 100 дан ортиқ ходимни ишдан олди ва бундай ишга алоқадор 37 компанияни қора рўйхатга киритди, деб хабар бермоқда «Интерфакс».
Компания тўртинчи чоракдан бошлаб ўғрилик ва пора олишда гумонланган 60 дан ортиқ иш устида тергов жараёнини олиб борган. Гумон қилинаётган жиноятлар билан боғлиқ 40 нафарга яқин киши ҳуқуқни муҳофаза қилиш идораларига текширувга берилган.
Хабарда айтиб ўтилган ҳолатлар қаторида Interactive Entertainment Group, Platform & Content Group вa Cloud & Smart Industries Group компанияларининг собиқ ходимлари ҳам бор.
Tencent коррупцияга қарши курашиш сиёсатининг ҳар қандай бузилишларига нисбатан «ноль тоқатсизлик» кўрсатишини ва четдаги ташкилотлар аралашган ҳолатларда полисия билан яқиндан ҳамкорлик қилишини таъкидлаган.
3 февраль кунги Гонконг савдоларида Tencent акциялари 1,6 фоизга кўтарилган. Жорий йил бошидан буён компаниянинг капиталлашуви 30,5 фоизга ўсган.
Tencent Holdings Хитойнинг йирик компанияларидан бири бўлиб, у WeChat мессенжери ва бир қатор оммавий онлайн-ўйинлар яратувчисидир. Ҳозирда компания онлайн тўловлар, мобил ва телекоммуникацион хизматлар ва онлайн реклама соҳасида етакчи ҳисобланади.
Изоҳ (0)