Британиянинг Стаффордшир графлигида яшовчи Жозеф Флавилл ўн бир ой комада бўлди. Шу вақт ичида у коронавирус билан икки марта касалланган. Айни пайтда 19 ёшли бемор соғаймоқда, дея хабар берди Daily Mail.
Машина уриб юборгани учун Жозеф 2020 йилнинг 1 мартида касалхонага ётқизилган. Уч ҳафта ўтгач, Буюк Британияда биринчи карантин жорий этилди. Ўн бир ой давомида Жозеф комада бўлди ва шу вақт ичида у икки марта COVID-19’га чалинди. Шифокорлар йигитчани даволашга муваффақ бўлди.
Флавилл яқинда комадан чиқди. Карантин чекловлари туфайли унинг оиласига касалхонага ташриф буюриш тақиқланади. Жозеф оиласи билан видеоалоқа орқали мулоқот қилади. Яқинлари ҳозирча унга коронавирус инфекцияси ҳақида айтмасликка қарор қилди.
Аввалроқ Британияда 100 ёшли фахрий коронавирусдан вафот этганди. У коронавирусга қарши курашда шифокорларга ёрдам бериш мақсадида хайрия жамғармаси ташкил қилган ва 32 миллион фунт стерлингдан кўпроқ маблағ йиғган.
Эслатиб ўтамиз, Буюк Британияда коронавирус оқибатида вафот этганлар сони 100 мингдан ошди. Европа давлатларидан ҳеч бирида ҳали бундай кўрсаткич қайд этилмаганди. Британия ҳукумати коронавирусга чалинган фуқаролар уйда қолиши учун пул тўлашни таклиф қилмоқчилигини маълум қилган.
Изоҳ (0)