Австралиянинг Виктория штатида давлат рақами 1 бўлган Mercedes-AMG C 43 Estate ҳаракатланаётгани суратга олинди. Бу каби рақамнинг нархи 2,5 миллион Австралия долларини (1,9 миллион АҚШ доллари) ташкил этади, деб ёзади Motor.
Ноёб давлат автомобиль рақами 1932 йилда ишлаб чиқарилган. Тўлиқ қора пешлавҳага фақатгина Виктория штатининг қисқармаси — Vic ва 1 рақами туширилган. Ишлаб чиқарилганидан сўнг, Мельбурндаги давлат хизматчилари бу каби ноёб рақам кимнинг машинасини безаши лозимлиги борасида келиша олмаган. Натижада ноёб рақам автомобилларни рўйхатдан ўтказиш департаментига топширилган ва 1984 йилга қадар ўша ерда сақланган.
Шу йили Виктория штатида ўтказилган аукционда номаълум харидор қора рақамни 165 минг Австралия долларга сотиб олган. Таваккалга асосланган харидга қарамай, эксклюзив рақам нархи йилдан йилга қимматлашиб борган.
Мазкур давлат рақами биринчи бор Saab 9000 Turbo’га «тақилган». Ундан кейин эса ноёб табличка Ferrari, Rolls-Royce, Porsche 911 Turbo ва 911 Carrera, шунингдек, Mercedes-Benz E 55 AMG ва E 63 AMG’ни безаган. Ҳозирги харидор эса 1 давлат рақами белгисини Mercedes-AMG C 43 Estate’га ўрнатган. 80 йиллик тарихга эга ноёб рақамни харид қилиш учун харидор қарийб 2 миллион АҚШ доллари тўлаган.
Изоҳ (0)