Бутун дунё бўйлаб коронавирусга қарши эмланганлар сони биринчи марта ушбу вирусга чалинганлар сонидан ошди, деб хабар бермоқда «ТАСС» расмий маълумотларга таяниб.
Дунёда камида 105,1 миллион киши вакцина олган бўлса, пандемия бошидан буён касалликни юқтирганлар сони 103,9 миллион кишини ташкил қилмоқда (шуларнинг 2,2 миллиондан зиёди вафот этган).
Эмланганлар сони энг кўп АҚШда — 33,7 миллион киши. Иккинчи ўринда Буюк Британия бўлиб, у ерда жами 10,2 миллион киши эмланган (денгиз ортидаги ҳудудлар, Норманд ороллари ва Мэн оролларини ҳам ҳисобга олганда). Учинчи ўринни Исроил эгалламоқда — 5,05 миллион киши.
Эмланган аҳолининг улуши бўйича эса Исроил биринчи ўринда (56,86 фоиз), иккинчи ўринни БАА (38,83 фоиз), учинчи ўринни Сейшель ороллари (36,25 фоиз) эгалламоқда. Ўн фоизлик маррадан Буюк Британия (15,3 фоиз), Баҳрайн (11,02 фоиз) ва АҚШ (10,3 фоиз) ҳам ўтган.
Эслатиб ўтамиз, дунё бўйича COVID-19’га чалинганлар сони 100 миллиондан ошгани ҳақида 27 январь куни маълум бўлган бўлса, 2 февраль куни унга қарши эмланганлар сони 100 миллионлик маррадан ўтган эди.
Изоҳ (0)