Украинада учта телеканал ёпиб қўйилгач, «Мухолифат платформаси — Ҳаёт учун» партияси раисдоши Вадим Рабинович Олий Рада минбарида туриб, президент Владимир Зеленскийга нисбатан импичмент жараёни бошланишини маълум қилди, деб ёзади «РБК».
Бунга президентнинг «112», ZiK ва NewsOne телеканалларига қарши санкциялар киритиш қарори сабаб бўлди.
Рабинович Владимир Зеленскийни Уй-жой ва коммунал хизматлар тарифлари, COVID-19’га қарши вакцинанинг йўқлиги, тиббиётнинг хароблиги ва бошқа муаммолар ҳақидаги «ҳақиқатни одамларга етказаётган»ларнинг «оғзини ёпиш»да айблади.
«Бугун кечаси, шайтонлар эса доим тунда ишини қилади, мустақил Украина тарихида биринчи марта учта муҳим телеканал ўчириб қўйилди», — деди Рабинович. «Зеленский Украина халқига қарши чиқди, у Украинанинг европача келажагига қарши чиқди, чунки фашизм — бу келажак ҳам эмас, европача танлов ҳам эмас. Китобларни тақиқлаш ва ёқиш, каналларни ёпиш, журналистларни ўлдириш — бу ҳақиқий фашизм», — деб ҳисоблайди депутат.
«Эсда тутинг, сиз на партиямизнинг, на миллионлаб сайловчиларимизнинг оғзини ёпа олмайсиз. Сиз бизни қотилликлар, телеканалларни тақиқлаш, террор билан жим қила олмайсиз. Биз президент Зеленскийга нисбатан импичмент жараёнини бошлаймиз», — деди Рабинович.
Зеленский Украинадаги учта телеканалга қарши санкциялар ҳақидаги буйруқни 2 февраль куни имзолади. Ушбу каналлар «Мухолифат платформаси — Ҳаёт учун» партияси сиёсий кенгаши раҳбари Виктор Медведчукка алоқадор деб ҳисобланилади. Медведчукнинг ўзи президент қарорини ноқонуний деб атади.
Украинада январдан Уй-жой ва коммунал хизматлар кескин қимматлашди, шу жумладан, газ, иссиқ сув ва иситиш тизими учун тўловлар ошди. Бунинг натижасида кетма-кет норозилик акциялари бўлиб ўтди.
Изоҳ (0)