Арманистон пойтахти Ереванда парламент биноси ёнига 3 февраль куни эрталабдан намойишчилар йиғилди, улар бош вазир Никол Пашиняннинг истеъфосини талаб қилмоқда, деб ёзади «Интерфакс». Полиция акция иштирокчиларини ҳибсга олмоқда.
Арманистон парламентига бир неча юз киши келган, акция 17 та мухолифат партиясини бирлаштирувчи «Ватанни қутқариш ҳаракати» томонидан ташкиллаштирилган.
Парламент биносига яқин шоҳкўчани тўсишга уринган мухолифат фаолларини полиция ҳибсга ола бошлади. «Сизлар полициянинг қонуний талабларига бўйсунмаяпсиз», — деди куч вакиллари. Дастлабки маълумотларга кўра, ўнга яқин киши ҳибсга олинган.
Арманистон парламенти 3 февраль, чоршанба куни суд кодексига киритиладиган тузатишларни муҳокама қилмоқда.
Ҳукмрон «Менинг қадамим» фракцияси ташаббуси билан киритилаётган тузатишлар дастлабки ҳибс каби масалаларни кўриб чиқадиган янги суд тузишни кўзда тутади. Ҳукумат қайд этишича, амалдаги судьяларнинг кўпчилиги алоҳида мухолифат етакчилари билан боғлиқ бўлгани учун жиноят содир этганликда айбланаётган баъзи мухолифатчиларни дастлабки ҳибсга олишдан бош тортмоқда. Мухолифат эса бош вазир Никол Пашиняннинг ҳукумати уларнинг амрига бўйсунишга тайёр судьяларни тайинлаш имкониятига эга бўлади, деб ҳисоблаб, бунга қарши чиқмоқда.
Эслатиб ўтамиз, 10 ноябрь куни Тоғли Қорабоғ бўйича битим имзолангани, унга кўра Арманистон бир қатор ҳудудларни Озарбайжонга топширгани ҳақида хабар берилган эди. Мухолифат Пашинян «хоинлик» шартномаси имзолангани сабабли истеъфога чиқишини талаб қилди. Шундан сўнг бош вазир истеъфога чиқишга тайёрлигини маълум қилди.
Изоҳ (0)