Amazon асосчиси Жефф Безос 2021 йилнинг учинчи чорагида компания бош директорлиги лавозимидан кетади ва директорлар кенгашининг ижрочи раиси бўлади. Унинг ўрнини 1997 йилдан бери Amazon’да ишлаб келаётган ва Amazon Web Services’ни бошқарадиган Энди Жесси эгаллайди, деб ёзмоқда «Коммерсантъ».
«Йилнинг учинчи чорагида мен директорлар кенгашининг ижро этувчи раиси лавозимига ўтаётганимни мамнуният билан эълон қиламан», — деди Безос. У Энди Жессининг ажойиб етакчига айланишига ишонади. «Мен айни пайтда Amazon энг юқори инновацион даражада турганига гувоҳ бўлмоқдаман, шунинг учун алмашинув вақти келди», — дея таъкидлади бизнесмен.
2020 йилда Amazon’нинг даромади 38 фоизга ўсиб, 386,1 миллиард долларни ташкил этди (2019 йилда 280,5 миллиард доллар бўлган). Йил давомида компания 21,3 миллиард доллар фойда кўрди.
Amazon интернет орқали товар ва хизматларни сотадиган энг йирик корпорациядир. Жефф Безос унга 1994 йилда асос солган. Фонд бозорида компания қиймати 1,69 триллион долларга баҳоланмоқда. Жефф Безос Forbes’нинг энг бой одамлари рўйхатида биринчи ўринда туради. Унинг бойлиги 196,2 миллиард долларга тенг.
Аввалроқ Жефф Безос атроф-муҳитни муҳофаза қилишга 791 миллион доллар хайрия қилган. Унинг собиқ рафиқаси Маккензи Скотт тўрт ой ичида коронавирусга қарши кураш учун 4,1 миллиард доллар ўтказиб берган.
Изоҳ (0)