АҚШ давлат котиби Энтони Блинкен мамлакат ҳукуматининг Россиядаги норозилик намойишларига алоқаси йўқлигини маълум қилди. Бу ҳақда NBC News хабар берган.
Унинг сўзларига кўра, Россиядаги норозиликлар мамлакатнинг ички муаммолари ҳисобланади. АҚШ давлат департаменти раҳбари шу тариқа Россия ТИВнинг ички ишларга Вашингтоннинг аралашуви ҳақидаги айбловларига жавоб қайтарди.
Россия ТИВ Вашингтоннинг Алексей Навальнийни қўллаб-қувватлаш мақсадида фейк-хабарлар тарқатаётганлик ва назорати остидаги интернет-платформалари орқали одамларни норозилик акцияларида иштирок этишга чорлаётганликда айблаган.
«Россия ҳукумати мазкур воқеаларда бизнинг ҳам айбимиз бор деб ҳисоблаётган бўлса, катта хато қилмоқда. Бу уларнинг ички ишлари. Муаммо ҳукуматда. Гап Россия халқининг коррупция, автократия сабаб тушкунлик ва умидсизликка тушиб қолганида. Бунда Россия ҳукумати кўпроқ ичкарига эътибор қаратиши лозим ва ташқарини бу ишларда айбдор қилмаслиги керак»,— деган Блинкен.
Эслатиб ўтамиз, 17 январда сиёсатчи Алексей Навальний Германиядан қайтиши билан Шереметева аэропортида ҳибсга олинган. Суд уни 15 февралгача қамоқда ушлаб туриш ҳақида қарор чиқарган. Ушбу воқеадан кейин 23- ва 31 январь кунлари Россиянинг кўплаб шаҳарларида норозилик намойишлари ўтказилди ва уларда 10 мингдан зиёд одам иштирок этди.
Изоҳ (0)