31 январь куни Россиянинг турли шаҳарларида сиёсатчи Алексей Навальнийни қўллаб-қувватлаб ўтказилган акцияларда айни пайтга қадар 5362 киши қўлга олинган. Бундай маълумотларни «ОВД-Инфо» келтириб ўтди.
Meduza ёзишича, бу ушбу ташкилот (2011 йил декабрда асос солинган) кузатувларининг бутун тарихи мобайнидаги қўлга олишлар бўйича мутлақ рекорд кўрсаткич ҳисобланади.
Энг кўп одамлар Москвада ҳамда Санкт-Петербургда қўлга олинган, ундан кейинда Красноярск, Нижний Новгород, Тверь ва бошқа шаҳарлар бормоқда.
Намойишлар бу сафар ҳам ўнлаб шаҳарларда бўлиб ўтди — баъзи жойларда бир ҳафта аввалгидан ҳам кўпроқ одамлар кўчаларга чиқди. Екатеринбург ва Новосибирскдаги намойишлар энг кўп иштирокчиларни ўз ичига олгани ҳақида маҳаллий мустақил ОАВлар ёзмоқда. Екатеринбургда 7 минг, Новосибирскда — 5 минг киши намойишларга чиққан.
Акциялар бошланишидан олдин Москва ва Санкт-Петербург марказлари тўсиб қўйилди. Москва маъмурлари 31 январь куни марказда пиёдалар ҳаракати чекланиши, метро станциялари, умумий овқатланиш жойлари ва дўконлар ёпиқ бўлиши ҳақида олдиндан огоҳлантирган эди. Петербургда ҳам марказ шу тарзда тўсиб қўйилди, аммо бу ҳақда олдиндан маълум қилинмаган эди. Охир-оқибат, Навальний тарафдорлари акцияларни Москва ва Петербургнинг бошқа нуқталарига кўчирди.
Москвада намойишчилар Навальний сақланаётган «Матросская тишина» тергов изоляторига юриш уюштирди, у ерда полиция томонидан шафқатсизлик билан тарқатилди. Акция иштирокчиларига нисбатан кун давомида бир неча марта электрошокерлар қўлланилди.
Петербургда ҳам намойишчиларга қарши кўзни ёшлантирувчи газ ва электрошокерлар ишлатилди, улар дубинкалар билан калтакланди ва хизмат қуроли билан қўрқитилди.
Россиянинг бошқа ҳудудларида ҳам одамлар оммавий равишда қўлга олинди, уларнинг кўпчилиги дўппосланди. Кўпчилик шаҳарларда яна мухбирлар қўлга олинди.
Бундай митинглар ўтган якшанба куни — 23 январда ҳам Россиянинг ўнлаб шаҳарларида, шунингдек, чет элда — Австралия, Германия, Австрия, Чехия, Буюк Британия, АҚШ, Черногория ва бошқа мамлакатларда ҳам бўлиб ўтган эди. Акцияларда ўн минглаб одамлар қатнашди, уч мингдан зиёд одам қўлга олинди.
Айни пайтда Навальний Москвадаги 1-рақамли тергов изоляторида сақланмоқда. Суд сиёсатчини шартли судланган шахснинг хулқ-атвор қоидаларини бузган деб ҳисоблаб, уни Федерал жазони ижро этиш хизматининг талабига биноан 30 кунга ҳибсга олган ва 15 февралга қадар қамоқда бўлишини маълум қилган.
Изоҳ (0)