Daniyada koronavirus mutatsiyasining oldini olish uchun barcha qorako‘zanlar yo‘q qilinadi
Hayvonlar orasida koronavirus aniqlangani sabab Daniyadagi fermalarda yashovchi barcha qorako‘zanlar (norka) o‘ldiriladi. Bu kabi qaror mamlakat hukumati tomonidan qabul qilingan, deb xabar beradi “RBK”.
“Daniyadagi barcha qorako‘zanlar o‘ldirilishi kerak”, — deydi mamlakat bosh vaziri Mette Frederikson onlayn rejimda o‘tkazilgan matbuot anjumani vaqtida. Ayni vaqtda siyosatchi avvalroq koronavirus tashxisi qo‘yilgan adliya vaziri Nik Xekkerup bilan izolyatsiyada.
Frederiksenning so‘zlariga ko‘ra, odamlar orasida tarqalib, ularda antitanalar shakllanish xususiyatini kuchsizlantirayotgan qorako‘zanlarda mutatsiyaga uchragan koronavirus infeksiyasi sabab keskin harakatlarni amalga oshirish zarur.
Bosh vazirning ta’kidlashicha, qorako‘zanlarda aniqlangan mutatsiyaga uchragan koronavirus vaksina yaratilishida muammoni yuzaga keltirishi mumkin.
Hozirgi kunda mutatsiyaga uchragan koronavirus bilan kasallanish holati Yutlandiya orolidagi 207 ta qorako‘zanda va 12 kishida aniqlangan. Frederiksenning so‘zlariga ko‘ra, virus nafaqat Daniyaning boshqa bir qismiga, balki butun dunyoga tarqalishi mumkin.
“Fuqarolarimiz oldida mas’ulmiz, biroq aniqlangan mutatsiyani hisobga olsak, dunyoning qolgan aholisi qarshisida ham mas’uliyatimiz bor”, — deydi Frederiksen.
Daniyada qorako‘zanlar orasida koronavirus iyun oyida aniqlangan edi. Daniya Damlamalar davlat insituti direktori Kare Molbakning ta’kidlashicha, eng yomon sseneriy yuzaga kelsa, “Daniyadan tarqaluvchi yangi pandemiya” boshlanishi mumkin.
Eslatib o‘tamiz, aprel oxirlarida AQShda ilk bor mushuklarda ham koronavirus qayd etilgandi. Undan avvalroq esa Nyu-Yorkdagi Bronks hayvonot bog‘ida yo‘lbars koronavirus yuqtirib olgani haqida xabar berilgan edi. Shuningdek, may oyida Niderlandiyada koronavirus qorako‘zandan insonga yuqishi aniqlangan.
