Microsoft асосчиси ва собиқ раҳбари Билл Гейтс Sueddeutsche Zeitung’га берган интервьюсида ўзининг коронавирус пандемиясига алоқадорлиги тўғрисидаги фитна назариясига изоҳ берди, деб ёзади «РБК».
Тадбиркорнинг таъкидлашича, одамлар «оддий ечимларни» қидиради ва вирус тарқалиши ортида кимдир турмасмикан деган саволни беради. «Нотўғри маълумот вакцинацияга халақит беради, бунинг оқибатида эпидемия узоқроқ давом этади», — дейди Гейтс.
Microsoft собиқ раҳбарининг сўзларига кўра, Билл ва Мелинда Гейтс фонди одамларнинг вакцинацияга бўлган ишончсизлигига анчадан буён дуч келади. Масалан, Покистон ва Нигерия каби давлатларда полиомиелитга қарши кураш вақтида дори воситасининг хавфсиз эмаслиги тўғрисида миш-мишлар тарқалган — гўёки у бепуштликка олиб келади. «Биз таъсир доираси катта бўлган инсонларга, диний уламоларга мурожаат қилиб, улардан вакцинациянинг аҳамиятини аҳолига тушунтиришларида ёрдам сўрадик», — дейди у.
Тадбиркорнинг ҳисоблашича, коронавирус кундалик ҳаётнинг бир қисмига айланиб улгурган — «худди зилзила, торнадо ёки иқлим ўзгаришлари каби». Ҳукуматнинг вазифаси эса фуқароларни бу каби офатлардан ҳимоя қилиш ҳисобланади. Унинг сўзларига кўра, агарда инсоният пандемияга яхшироқ тайёр турганида, барчаси бошқача бўларди, хусусан, ўлим ҳолати анча кам қайд этиларди.
Гейтс вируснинг яратилиши ортида тургани ва бундан фойда кўришни мақсад қилгани тўғрисидаги фитна назарияси ўтган йилнинг декабрь бошларида пайдо бўлганди. Тадбиркор вакцинация орқали одамларни чипслаштирмоқчи эканлиги ҳақидаги миш-мишлар ҳам кенг тарқалди. Microsoft собиқ раҳбари бунга ҳеч қандай алоқаси йўқлигини таъкидлаб, «бу каби аҳмоқона фикрларнинг мавжудлигидан» хавотирда эканлигини билдирган.
Изоҳ (0)