Avstriya poytaxti Vena shahrida 31-yanvar, yakshanba kuni hukumatning koronavirusga qarshi choralariga norozilik bildirish uchun 5000 ga yaqin odam ko‘chalarga chiqdi, deya xabar bermoqda “Korrespondent.net”.
Avval bo‘lib o‘tgan karantinga qarshi namoyish ishtirokchilarining aksariyati atay niqob kiymagani va ijtimoiy masofani saqlamagani uchun politsiya tomonidan hafta oxirida o‘tkaziladigan har qanday ommaviy tadbirlarga taqiq qo‘yilgandi. Miting ishtirokchilari ushbu taqiqlarga ahamiyat bermadi.
Bu safar ham aksariyat namoyishchilar sanitariya qoidalariga rioya qilishdan bosh tortdi. Ma’lum qilinishicha, ko‘chaga chiqqan fuqarolar orasida neonatsistlar harakati tarafdorlari va qasddan tartibsizliklar uyushtirgan kishilar bo‘lgan. Tarqalishdan bosh tortgan jamoat Avstriya parlamenti tomon yo‘l olgach, politsiya ularni hibsga olishni boshladi.
30-yanvar, shanba kuni o‘ng qanot Avstriya Ozodlik partiyasi ommaviy tadbirlarning taqiqlanishiga qarshi norozilik namoyishi o‘tkazish huquqidan mahrum bo‘lgandi. Shundan so‘ng partiya Vena aholisini 31-yanvar kuni namoyish o‘tkazishga chaqirdi. Politsiya o‘zining aksiya o‘tkazishni taqiqlashga oid qarorini koronavirus tarqalishi xavfi tufayli, deya izohladi.
Avstriyada koronavirus pandemiyasi
Avstriyada koronavirusga qarshi qat’iy karantin choralari tashkil etilgan. Mamlakatda maktablar, sport zallari, madaniyat muassasalari, shuningdek, ko‘pgina do‘konlar yopiq. Mazkur choralarga qaramay, 31-yanvar kuni Sog‘liqni saqlash vazirligi o‘tgan bir kecha-kunduzda SARS-CoV-2 virusini yuqtirish bo‘yicha 1190 ta yangi holat haqida xabar berdi.
Bryusselda karantinga qarshi namoyish hibsga olish bilan yakunlandi
Belgiya poytaxti Bryussel markazida karantin choralariga qarshi namoyishga chiqqanlarning 300 nafari politsiya tomonidan hibsga olindi. Politsiya Bryussel markaziy temiryo‘l vokzali va Mon-de-Art atrofidagi namoyishlarni tarqatib yubordi.
28-yanvar, payshanba kuni hukumat ommaviy to‘planish koronavirus tarqalishini tezlashtirishi mumkin degan xavotirda miting o‘tkazilishiga ruxsat bermagandi. Yakshanba kuni politsiya yig‘ilmaslik haqidagi chaqirig‘ini takrorladi.
Belgiya hukumati infeksiyaning yangi to‘lqini avj olishiga yo‘l qo‘ymaslik maqsadida 1-martga qadar vatanga qaytish zaruratidan tashqari mamlakatga uyushtiriladigan barcha sayohatlarni taqiqladi. Bundan tashqari mamlakatda komendantlik soati, uydan turib ishlash, restoran va barlarning yopilishi singari cheklovlar o‘rnatilgan. Belgiyaning ba‘zi shaharlar va munitsipalitetlarida qat’iy qoidalar o‘rnatilgan.
Eslatib o‘tamiz, Niderlandiyada karantinga qarshi namoyishlar Rotterdam, Xertogenbos, Amsterdam, Gaaga, Zvolle, Tilburg, Xelena shaharlarida bo‘lib o‘tdi. Amsterdamdagi tartibsizlik paytida portlashlar yuz bergan.
24-yanvar kuni Niderlaniyada karantin muxoliflari COVID-19 test markazini yoqib yuborgan. Namoyishchilarni tarqatish uchun politsiya kuchlari suv zambaraklari, otlar, itlar va dubinkalardan foydalanishga majbur bo‘ldi. Eyndxovenda politsiya ko‘zni yoshlantiruvchi gazdan foydalangan.
Avvalroq Livan shimolida joylashgan Tripoli shahrida lokdaunga qarshi namoyishchilarning huquq-tartibot organlari xodimlari bilan to‘qnashuvi sodir bo‘lgandi. Besh nafar namoyishchi va uch nafar ichki xavfsizlik xodimi jarohat olib, o‘nlab odamlar hibsga olingan.
Izoh (0)