Шавкат Мирзиёев 2020 йил 30 октябрда «Соғлом турмуш тарзини ҳаётга кенг татбиқ этиш ва оммавий спортни янада ривожлантириш чора-тадбирлари тўғрисида»ги фармонни имзолаган, унда аҳолини кунлик юриш ва югуришга тарғиб қилиш мақсадида «Соғлом турмуш тарзи» платформаси яратилиши белгиланган эди.
Унга кўра, «бир сутка давомида 10 минг ва ундан ортиқ қадам юрган 18 ва ундан юқори ёшдаги Ўзбекистон фуқаросининг электрон ҳамёнига 3 минг сўм, бир ойда бир марта туман (шаҳар) бўйича энг кўп юрган шахсга 300 минг сўм, ҳудудлар бўйича энг кўп юрган шахсга 500 минг сўм, республика бўйича энг кўп юрган шахсга 1 миллион сўм қўшимча равишда платформадаги электрон ҳамёнига ўтказилиши қайд этилган ва бу жамоатчиликда катта қизиқиш уйғотганди.
Шунингдек, фармонда мазкур ишларни молиялаштириш аҳоли саломатлиги учун зарарли бўлган маҳсулотлар ишлаб чиқарувчилардан махсус йиғим жорий этиш ҳисобидан амалга оширилиши белгилаб қўйилган.
28 январь куни ҳукуматнинг «‘Соғлом турмуш тарзи’ платформасини амалга ошириш чора-тадбирлари тўғрисида»га қарори лойиҳаси муҳокамага қўйилди. «Халқ сўзи online» унда Президент фармонида келтирилган фуқаролар электрон ҳамёнига пул тўлаш ҳақидаги тартиблар акс этмаганига эътибор қаратди.
Хусусан, қарор лойиҳасида «Соғлом турмуш тарзи» платформасида рўйхатдан ўтган ва ундан фойдаланган жисмоний шахслар сонига ҳамда уларнинг спорт натижаларига қараб, давлат ва хўжалик бошқаруви органлари ҳамда маҳаллий давлат ҳокимияти органлари раҳбарларини ҳар чорак якуни бўйича баҳолаш рейтинг тартиби ишлаб чиқилган.
Унда 2021 йил 1 мартдан бошлаб Жисмоний тарбия ва спорт вазирлиги томонидан «Соғлом турмуш тарзи» платформасида рўйхатдан ўтган ва ундан фойдаланган жисмоний шахслар сонига ҳамда уларнинг спорт натижаларига қараб, вазирлик ва идоралар, маҳаллий давлат ҳокимияти органлари раҳбарларининг ҳар чорак якуни бўйича рейтинги тузилади ва улар фаолиятига Вазирлар Маҳкамаси томонидан баҳо берилиши қайд этилган.
Жисмоний тарбия ва спорт вазирлиги «Соғлом турмуш тарзи» платформаси амалиётга жорий этилгандан сўнг ундан рўйхатдан ўтган ва ундан фойдаланган жисмоний шахслар сонига ҳамда уларнинг спортни ривожлантириш натижалари юзасидан ишчи гуруҳ томонидан шакллантирилган ҳисоботлар асосида ҳар чорак якуни бўйича вазирлик ва идоралар раҳбарлари фаолиятига баҳо бериш амалиётини жорий этган ҳолда уларнинг очиқ рейтингини шакллантиради.
Ташкилотлар раҳбарларининг спорт натижалари рейтинги ҳар чорак якуни бўйича тўплаган умумий балларини аниқлаш йўли билан амалга оширилади.
Спорт натижалари бўйича ғолиб ташкилотларни аниқлаш қуйидагича амалга оширилади:
а) «Соғлом турмуш тарзи» платформасидан рўйхатдан ўтган ташкилот ходимлари сони (жами ходимлар сонига нисбатан фоизда) — 25 баллгача;
бир сутка давомида ўн минг ва ундан ортиқ қадам юрган энг кўп ташкилот ходимлари сони (жами ходимлар сонига нисбатан фоизда) — 20 баллгача;
ушбу спорт натижаларини энг кўп мунтазам равишда (ҳар бир ходим 7 кунда камида 2 марта) давом эттираётган ташкилот ходимлари сони учун — 20 баллгача;
бир сутка давомида ўн минг ва ундан ортиқ қадам юрган ташкилотнинг 50 ёшдан ошган энг кўп ходимлари учун қўшимча равишда — 10 баллгача баҳоланади.
б) ташкилотларда раҳбар ва ходимларнинг жисмоний тарбия билан шуғулланишлари учун махсус спорт комплекслари (тренажёр, фитнес заллар ва бошқалар) ташкил этилганлиги — 10 баллгача;
ташкилот ходимлари ўртасида спорт мусобақалари ташкил этилганлиги (ҳафтада камида бир марта) — 15 баллгача.
Ташкилотларнинг спорт натижалари 100 баллик рейтинг тизими асосида қуйидагича баҳоланади:
- 85,0—100 балл тўпланганда — «намунали»;
- 71,0—84,9 балл тўплаганда — «яхши»;
- 50,0—70,9 балл тўплаганда — «қониқарли»;
- 49,9 балл ва ундан кам балл тўплаганда — «қониқарсиз».
Ҳукумат қарори лойиҳасида бир сутка давомида 10 минг ва ундан ортиқ қадам юрган фуқароларга пул тўланиши ва у платформадаги электрон ҳамёнига ўтказилиши ҳақида ҳеч бир ўринда айтиб ўтилмаган.
Изоҳ (0)