Ўзбекистон 2023 йилга қадар коронавирусга қарши вакцинадан кенг фойдалана олмайди. Бу ҳақда The Economist Intelligence Unit таҳлилчиларига таяниб, Repost хабар берди.
Таъкидланишича, Ўзбекистон билан бир қаторда дунёнинг яна 85 та мамлакати вакцинадан энг охирида фойдаланади.
Мутахассисларнинг фикрича, биринчилардан бўлиб Европа давлатлари, АҚШ, Сингапур, БАА ва Гонконг вакцинани қўлга киритади. Ушбу мамлакатларда вакцинадан бемалол фойдаланиш имконияти 2021 йил охирига қадар пайдо бўлади.
The Economist эксперларининг таъкидлашича, ўртача даромадга эга айрим давлатлар ва даромади паст бўлган аксарият давлатлар вакциналарнинг COVAX дастури ёрдамида етказиб берилишига умид қилмоқда. Қайд этилишича, мазкур ташаббус қашшоқ мамлакатлар учун 6 миллиард доза вакцинани етказиб берилишини таъминлаши керак.
Ўзбекистон вакцинани биринчи бўлиб қўлга киритадиганлар рўйхатида энг охирги ўриндаги давлатлар қаторида жойлашган. Ушбу мамлакатларнинг аксарияти Африка қитъасида жойлашган.
Маълум қилинишича, вакциналарнинг дастлабки 2 миллиард дозаси 2021 йилда, асосан, соғлиқни сақлаш ходимларига тарқатилади. Шу билан бирга, COVAX дозалари ҳар бир мамлакат аҳолисининг фақат 20 фоизини қамраб олади. COVAX’нинг етказиб берилиши секин амалга ошиши мумкин, айниқса, ишлаб чиқариш ва етказиб беришдаги узилишлар сабаб.
Таҳлилчилар ўз прогнозларини етказиб бериш шартномалар, ишлаб чиқаришнинг чекланганлиги, вакциналарга ишончсизлик, аҳоли сони ва тиббиёт ходимларининг сонига асосланиб тақдим этган.
Аввалроқ GAVI («Эмлаш ва иммунизация бўйича глобал альянс») ташкилоти томонидан Ўзбекистон COVAX’га (Коронавирус инфекциясига қарши эмлаш механизми) аъзо давлатлар қаторига киритилганлиги маълум қилинган эди.
Эслатиб ўтамиз, ҳозирча ЖССТ фақатгина Pfizer ҳамда BioNTech компаниялари ишлаб чиқарган вакцинани фойдаланиш учун маъқуллаган.Маълумот учун, Гамалея институти коронавирусга қарши «Спутник V» вакцинасини ишлаб чиқарган. Ҳозирда вакцинадан фавқулодда фойдаланишни Россиядан ташқари Аргентина маъқуллаган. Вакцина клиник синовлари учинчи босқичининг оралиқ таҳлил натижалари 92 фоиз самарадорликни ташкил этишини кўрсатди. Декабрь ойи бошларида вакцина иккита компонентининг максимал нархи маълум қилинди.
Изоҳ (0)