Ҳибсда сақланаётгани хабар қилинган Қирғизистон собиқ бош вазири Муҳаммадкалий Абилгазиев суд қарорига кўра 2021 йил 26 мартга қадар қамоқда ушлаб турилади. Бу ҳақда мамлакат Олий судининг матбуот хизмати берган маълумотга таяниб, «ТАСС» хабар тарқатди.
«Бишкек шаҳридаги Первомайск туман судининг 2021 йил 28 январдаги қарорига кўра гумонланувчи Абилгазиев 26 мартга қадар ҳибсда сақланади», – деган Олий суд вакили.
Қирғизистон ҳукуматининг собиқ раҳбари Абилгазиев 2018–2020 йиллар давомида Вазирлар маҳкамасини бошқарган. У 26 январь куни катта майдондаги ер участкаларини ноқонуний равишда ажратиб бериш ва қонунга хилоф равишда бойлик орттириш жиноятларини амалга оширганликда гумон қилинмоқда.
Қирғизистон давлат Миллий хавфсизлик қўмитасининг Коррупцияга қарши кураш хизмати берган маълумотларга кўра, собиқ бош вазир «Кумотр голд компани» номли корхона номига Иссиқкўл вилоятидаги олтин кони жойлашган ерларни геологразведка ва олтин қазиб олиш учун ажратиб бериш ҳақида қарор имзолаган. Оқибатда олтин кони жойлашган майдон икки баравар кенгайиб, 26,3 минг гектарга етган.
Қўмитанинг қайд этишича, қарор имзоланган даврда олтин кони ҳудудини кенгайтириш ва атроф-муҳитнинг ландшафт хилма-хиллиги, табиий ресурслар, «Қизил китоб»га киритилган ўсимлик ва ҳайвонот дунёсига зарар етказиши ҳақидаги ҳукумат қарори ўз кучида бўлган. Мазкур ҳудудлардаги ишларни янада кенгайтирилиши Иссиқкўл ҳудудида иқлим ўзгаришларига олиб келиши ва мамлакат экологиясига салбий таъсир қилиши мумкин, дея ҳисоблайди Қирғизистон давлат Миллий хавфсизлик қўмитаси.
Махсус хизмат берган маълумотларга кўра, Абилгазиев ҳукуматга раҳбарлик қилган даврда унинг норасмий даромадлари сезиларли даражада ошган. Собиқ бош вазир фаол тарзда кўчмас мулк харид қилган ва уларни бошқа шахслар номига расмийлаштирган.
Изоҳ (0)