Германия COVID-19 коронавирусига қарши вакцина етишмаслиги сабабли қийин даврга дуч келади, деди мамлакат соғлиқни сақлаш вазири Йенс Шпан. Бу ҳақда «Интерфакс» маълум қилди.
«Вакцина етишмовчилиги сабаб бизни камида 10 та оғир ҳафта кутмоқда», – дея вазирнинг сўзларини келтирган Европа оммавий ахборот воситалари.
Шпан эмлаш жараёнларини муҳокама қилиш учун Германияда федерал ва минтақавий ҳокимият иштирокида саммит чақирмоқчи эканини қўшимча қилди.
Еврокомиссиянинг соғлиқни сақлаш бўйича аъзоси Стелла Кириакидис AstraZeneca компаниясига COVID-19 вакцинасини етказиб бериш жараёнига ўзгартириш киритгани учун аниқлик киритишни сўраб хат юборди. Таъкидланишича, компания Европа Иттифоқига дастлаб келишилганидан анча кам дозаларни юборган.
Унинг сўзларига кўра, илгари Европа Иттифоқи ушбу компания вакцинани яратиши ва уни ишлаб чиқаришини молиялаштириб, уларни тез етказиб бериш учун олдиндан буюртмалар берган. Энди расмий Брюссель «шартноманинг тўлиқ бажарилишини» хоҳламоқда.
Стелланинг сўзларига кўра, «келгусида Европа Иттифоқида COVID-19 вакциналарини ишлаб чиқарадиган барча компаниялар ўз вакциналарини экспорт қилмоқчи бўлса, бу тўғрисида олдиндан хабар беришлари шарт».
Европа дори-дармон агентлиги (EМА) ушбу ҳафтанинг охирига қадар AstraZeneca вакцинасини тасдиқлаши керак эди.
Европа Иттифоқи, илгари имзоланган келишувга мувофиқ, 2021 йилнинг биринчи чорагида 100 миллион дозада вакцина олиши керак. Аммо Иттифоқ ишлаб чиқариш масалалари сабабли буюртмани ярмини олади деган қўрқув бор.
Аввалроқ Европа комиссияси Европа Иттифоқига ва ҳамжамият мамлакатлари бўйлаб сафарлар бўйича тавсияларни кучайтиргани ҳамда Финляндия коронавируснинг янги штаммлари туфайли сайёҳларнинг мамлакатга ташрифини чеклаб қўйгани ҳақида хабар берилганди.
Изоҳ (0)