Ўзбекистонда 2020 йил карантин даврида автомобиль ҳаракатининг чекланиши туфайли атмосферага ойига 120 минг тонна чиқинди чиқиши камайган. Бу ҳақда Давлат экология қўмитасида бўлиб ўтган матбуот анжуманида Aтмосфера ҳавосини муҳофаза қилиш бош бошқармаси бошлиғи Умиджон Абдужалилов маълум қилди.
«Карантин сабабли мамлакат бўйича 90-95 фоизгача автотранспорт воситаларининг ҳаракатланиши чекланди. Ушбу чекланишларнинг атроф-муҳитга қандай таъсир қилингани сарҳисоб қилинди. Ўрганишлар натижасида аниқ бўлдики, мамлакатда автомобилларнинг чекланиши эвазига кунига 4 минг тонна ифлослантирувчи моддаларнинг атмосфера ҳавосига чиқарилиши камайган бўлса, бу ойлик кўрсаткичда 120 минг тоннани ташкил этди», – деди Умиджон Абдужалилов.
Таъкидланишича, 2019 йилги ўрганишга кўра, атмосферага мамлакат бўйича йилига ўртача 2,5 миллион тонна ифлослантирувчи модда чиқарилган бўлса, шунинг 1,5 миллион тоннадан ортиқ қисми транспорт воситаларидан чиқаётган ифлослантирувчи моддаларга тўғри келган.
«Умуман атмосфера ҳавосини ифлослантирувчи моддаларни икки омилга ажратадиган бўлсак, бу саноат ҳамда транспорт водиталарига тўғри келади. Айнан автранспорт воситаларининг атмосфера ҳавосини ифлослантирувчи омил сифатидаги улуши 60-65 фоизни ташкил қилади», – деди Умиджон Абдужалилов.
Изоҳ (0)