Самарқандда ЙПХ инспекторига 600 минг сўм пора беришга уринган фуқаро қўлга олинди. Бу ҳақда «Дарё» Самарқанд вилоят ИИБ ахборот хизмати маълум қилди.
Таъкидланишича, Самарқанд шаҳрининг Мирзо Улуғбек ва Буюк ипак йўли кўчалари кесишган чорраҳада ҳайдовчи Х.Б. бошқарувидаги «ВАЗ-2103» йўл ҳаракати қоидаларини бузиб ҳаракатлангани учун тўхтатилган ва тегишли тартибда ҳайдовчига нисбатан маъмурий баённома расмийлаштирилган. Автомашина эса вақтинчалик жарима майдончасига жойлаштирилган.
Шундан сўнг ҳайдовчи инспекторга автомашинасини жарима майдончасидан чиқариб бериши эвазига 600 минг сўмни пора тариқасида таклиф қилган. ЙПХ инспектори ушбу ҳолат юзасидан билдирги орқали вилоят ИИБ бошлиғи номига мурожаат қилган.
Мазкур билдиргига асосан ИИВ Ўз хавфсизлиги бошқармаси ҳамда Самарқанд шаҳар прокуратураси ходимлари томонидан ўтказилган тезкор тадбирда фуқаро Х.Б. ЙПХ инспекторига 600 минг сўмни пора тариқасида берган вақтда ашёвий далиллар билан ушланган.
Ҳолат юзасидан Жиноят кодексининг 211-моддаси 1-қисми (пора бериш) билан жиноят иши қўзғатилган.
Изоҳ (0)