Навоий вилоятида спиртли ичимлик истеъмол қилгани учун автомобиль бошқарувини 10 ёшли ўғлига ишонган хатирчилик ота жаримага тортилди. Бу ҳақда «Дарё»га вилоят ИИБ ЙҲХБ матбуот гуруҳи раҳбари Фарруҳ Якубов маълум қилди.
Таъкидланишича, вилоятнинг Қизилтепа туманида ЙПХ ходимлари томонидан маст отанинг ўз Matiz’ини 10 ёшли фарзандига ишониб бергани аниқланиб, отага нисбатан маъмурий чора белгиланган.
Фуқаро Қ.Ф.га нисбатан Маъмурий жавобгарлик тўғрисидаги кодекснинг 135-моддаси 2-қисми (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) билан маъмурий баённома расмийлаштирилган.
Ушбу моддага кўра, ҳуқуқбузар базавий ҳисоблаш миқдорининг беш баравари миқдорида — 1 миллион 115 минг сўм жаримага тортилади.
Эслатиб ўтамиз, аввалроқ 8 ёшли бола ҳаракатга келтирган Lacetti Тошкентдаги Маkrо супермаркети ичига кириб кетгани, Сурхондарёда 14 ёшли «ҳайдовчи» халқаро аҳамиятга эга йўлда Labо ҳайдаб кетаётгани ҳамда Самарқандда 14 ёшли бола бошқарувидаги Tracker ЙТҲга учраши оқибатида ҳайдовчининг тенгдоши вафот этгани ҳақида хабар берилганди.
Изоҳ (0)