O‘zbekistonda 2020-yil karantin davrida avtomobil harakatining cheklanishi tufayli atmosferaga oyiga 120 ming tonna chiqindi chiqishi kamaygan. Bu haqda Davlat ekologiya qo‘mitasida bo‘lib o‘tgan matbuot anjumanida Atmosfera havosini muhofaza qilish bosh boshqarmasi boshlig‘i Umidjon Abdujalilov ma’lum qildi.
“Karantin sababli mamlakat bo‘yicha 90-95 foizgacha avtotransport vositalarining harakatlanishi cheklandi. Ushbu cheklanishlarning atrof-muhitga qanday ta’sir qilingani sarhisob qilindi. O‘rganishlar natijasida aniq bo‘ldiki, mamlakatda avtomobillarning cheklanishi evaziga kuniga 4 ming tonna ifloslantiruvchi moddalarning atmosfera havosiga chiqarilishi kamaygan bo‘lsa, bu oylik ko‘rsatkichda 120 ming tonnani tashkil etdi”, – dedi Umidjon Abdujalilov.
Ta’kidlanishicha, 2019-yilgi o‘rganishga ko‘ra, atmosferaga mamlakat bo‘yicha yiliga o‘rtacha 2,5 million tonna ifloslantiruvchi modda chiqarilgan bo‘lsa, shuning 1,5 million tonnadan ortiq qismi transport vositalaridan chiqayotgan ifloslantiruvchi moddalarga to‘g‘ri kelgan.
“Umuman atmosfera havosini ifloslantiruvchi moddalarni ikki omilga ajratadigan bo‘lsak, bu sanoat hamda transport voditalariga to‘g‘ri keladi. Aynan avtransport vositalarining atmosfera havosini ifloslantiruvchi omil sifatidagi ulushi 60-65 foizni tashkil qiladi”, – dedi Umidjon Abdujalilov.
Izoh (0)