Россияда аёл киши бошқарувидаги Mercedes-Benz автотураргоҳнинг тўртинчи қавати деворини тешиб қўйди (видео)
Москва вилоятидаги Долгопрудний шаҳрида ноодатий кўнгилсиз ҳодиса содир бўлди: Mercedes-Benz кўп қаватли автомобиллар тураргоҳининг деворини тешиб чиқди. Тўртинчи қаватда осилиб турган седаннинг видеоси ижтимоий тармоқларда тарқалган, деб хабар беради Motor.
Маълумотларга кўра, автомобилни аёл киши бошқараётган бўлган. 27 январь тонгида у «Ракета қурувчилар» шоҳ кўчасидаги автотураргоҳга кирган, бироқ тезликнинг ҳисобини ололмаган ёки газ ва тормоз тепкиларини чалкаштириб юборган.
Натижада Mercedes-Benz бино деворини тешиб ўтган ва мўъжиза сабабли ташқарига қулаб тушмаган — афтидан, ҳайдовчи вақтида тормозни босишга улгуриб қолган.
ЙТҲ жойидан олинган видеога кўра, немис седани ғиштли девор билан тўқнашувда ўзини «мардонавор» тутган ва ҳатто пачоқланмаган. Маълум қилинишича, ҳайдовчига ҳам ҳеч қандай зарар етмаган. Орадан бир соат ўтгач Mercedes чиқариб олинган, бироқ деворда ҳосил бўлган тешик ҳамон турибди.
Аввалроқ Британияда Audi йўл бўйидаги уйлардан бирига урилиб, ўзи билан кириш эшигини «олиб кетгани» тўғрисида хабар берилганди.
