Amerikaning Ogayo shtatida yashovchi er-xotin to‘yining 70 yilligini nishonlaganidan so‘ng uch hafta o‘tib vafot etdi. Bu haqda People nashri xabar beradi.
Ma’lum qilinishicha, 2020-yilning dekabrida 89 yoshli Dik Mik va uning rafiqasi 87 yoshli Shirli Mik o‘zini yomon his qila boshlagan.
Juftlik 8-yanvar kuni koronavirusni aniqlashga doir test topshirgan. Natija ijobiy chiqqani sabab ularning har ikkisi bir kunda shifoxonaga gospitalizatsiya qilingan.
Ularning ahvoli to‘satdan yomonlashgani sabab, qarindoshlar shifokorlardan er-xotinga hayotining so‘nggi daqiqalarini birga o‘tkazishiga ruxsat berishini so‘rashgan. 16-yanvar, shanba kuni ular bir palataga joylashtirilgan. Keksa juftlik bir-birining qo‘lidan tutgan holda hayotdan ko‘z yumgan. Shirli boshini turmush o‘rtog‘ining yelkasiga qo‘ygan, shu vaqtda palatada ularning sevimli qo‘shig‘i yangrab turgan edi. Birinchi bo‘lib ayol, bir necha daqiqadan keyin esa erkak hayotni tark etgan.
Juftlikning qarindoshlari ularning yillab davom etgan sevgi hikoyasi ertaklardagidek yakun topganini ma’lum qilgan. Dik va Shirli 19-yanvar kuni COVID-19’ga qarshi emlanishi kerak bo‘lgan, deyiladi xabarda.
Izoh (0)