Самарқанд вилоятининг Пахтачи туманида Spark ва Nexia-3 тўқнашувида йўл четида турган аёл жабрланди. Бу ҳақда ЙҲХББ матбуот хизмати хабар берди.
Маълум қилинишича, воқеа 20 январь куни соат 11:05 ларда туманнинг Амир Темур кўчасида юз берган.
1993 йилда туғилган Ф.С. Spark’да ҳаракатланаётиб йўл ҳаракати қоидаларига амал қилмасдан, чап томонга бурилаётган вақтида бир йўналишда ортида ҳаракатланиб келган, 1994 йилда туғилган ҳайдовчи О.Х. бошқарувидаги Nexia-3 билан тўқнашган.
Зарб оқибатида Spark йўл четида турган аёлни уриб юборган. Оқибатда 1964 йилда туғилган пиёда Д.С. тан жароҳати олиб, шифохонага ётқизилган. Самарқанд вилояти ИИБ матбуот хизматининг маълум қилишича, айни пайтда пиёданинг аҳволи яхши.
Ушбу ЙТҲ юзасидан тўпланган ҳужжатлар Жиноят ишлари бўйича Пахтачи тумани судига юборилган.
Аввалроқ Самарқандда 4 та автомобиль иштирокида ЙТҲ содир бўлгани, Тошкентда ҳам 4 та автомобиль тўқнашиб, бунинг оқибатида 5 киши жабрлангани, масофа сақламаслик оқибатида 5 та автомобиль тўқнашгани ҳақида хабар берилган эди.
Изоҳ (0)