Москвада 1971 йилда ишлаб чиқилганидан буён 12,4 минг километр йўл босган «ГАЗ-69» сотувга қўйилди. Идеал ҳолатда сақланган армия йўлтанламасини 1,5 миллион рублга (20 минг доллар) харид қилиш мумкин, деб хабар беради Motor.
«ГАЗ-69» Иккинчи жаҳон урушидан кейинги даврда армияда, шунингдек, ижтимоий ва қишлоқ хўжалиги эҳтиёжларида кенг фойдаланилган йўлтанламас ҳисобланади. 1952 йилдан 1973 йилга қадар Горкий ва Улянов автомобиль заводларидан 600 мингдан ортиқ шу турдаги моделлардан ишлаб чиқарилган. 20 йиллик ишлаб чиқариш давомида «ГАЗ-69» дунёнинг 56 мамлакатига экспорт қилинган. Кейинчалик «ГАЗ-69» ўрнини «УАЗ-469» эгаллаган бўлиб, ҳозирда у «Хантер» номи остида ишлаб чиқарилмоқда.
Сотувга қўйилган йўлтанламас ечиладиган тентли классик кузов компоновкасига эга. Сотувчининг сўзларига кўра, афсонавий «ГАЗ-69» ҳеч қачон реставрация қилинмаган, шу сабаб автомобиль заводдаги барча оригинал деталларини сақлаб қолган ва улар соз ҳолатда. Эълон қилинган суратларда машина ростдан ҳам яхши ҳолатда эканини кўриш мумкин, бироқ интерьер суратлари тақдим этилмаган.
Тўлиқ узатмали «ГАЗ-69» 55 от кучига эга 2,0 литрли бензин двигатель билан жиҳозланган бўлиб, у механик трансмиссия ёрдамида бошқарилади. Сотувчи мазкур машинани 1,5 миллион рублга сотишга тайёр. Россияда бу пулга янги «УАЗ Патриот» харид қилиш мумкин.
Аввалроқ Италияда деярли юрмаган «Москвич» сотувга қўйилгани ва у янги Toyota Corolla нархида баҳоланаётгани тўғрисида хабар берилганди.
Изоҳ (0)