Canepa аукциони орқали 1980 йилда ишлаб чиқарилган ва ҳозирга қадар 36,6 минг километр йўл босган ноёб BMW М1 суперкари сотувга қўйилади. 456 нусхада яратилган ўрта моторли модель 20 йил гаражда ҳаракатсиз турган, деб ёзади Motor.
BMW М1 Бавария концернининг энг ноёб моделларидан бири ҳисобланади. Аввалига немис мутахассислари Lamborghini билан ҳамкорликда FIA пойгалари учун Group 4 классига кирадиган такомиллаштирилган автомобилни яратишни режалаштирган. Бироқ италияликлар томонидан кутилмаганда берилган рад жавоби сабаб BMW спорткарнинг 456 нусхасини ишлаб чиқара олган холос.
Сотувга қўйилган икки эшикли модель 1980 йилда ишлаб чиқарилган. Спорткарнинг биринчи эгаси уни 10 йил давомида Калифорнияда ҳайдаган. Бу вақт давомида купе 36,6 минг километр йўл босган. Шундан кейин номаълум сабабга кўра ноёб спорткар кейинги 20 йил давомида гаражда турган. Айни вақтда коллекция автомобили қайта тикланган ва сотувга тўлиқ тайёр.
Аввалига спорткар кўк рангда ишлаб чиқарилган. Бироқ унинг биринчи эгасининг талабига кўра, кузов оқ рангга бўялган. Қисман амалга оширилган реставрациядан сўнг, машина салони худди янгидек кўриниш олган. BMW М1 277 от кучига (330 Нм) эга 3,5 литрли V6 ёрдамида ҳаракатга келади. Агрегат беш поғонали механик узатмалар қутиси ёрдамида бошқарилади. Суперкар соатига 100 километр тезликка 5,6 сонияда эришади, максимал тезлиги — 260 км/соат.
Аввалроқ «Форсаж» юлдузига тегишли бўлган ўрта моторли BMW М1 аукционга қўйилгани тўғрисида хабар берилганди.
Изоҳ (0)