Нью-Йоркдаги пентхаус уйларда истиқомат қилувчи инсонлар 20 йил давомида уйларни тозалаган, бироқ пандемия сабабли ишидан айрилган Роза исмли фаррошга миннатдорчилик билдиришга қарор қилди. Улар аёлга икки йиллик ижара ҳақи тўланган пентхауслардан бирининг калитини топширган. Кутилмаган совғадан ҳайратга тушган аёлнинг видеоси Reddit тармоғига жойланган.
Ролик муаллифларининг таъкидлашича, Роза синглиси билан битта квартирада яшаб келган. Аёлни мижозлардан бирига намойиш этиш олдидан пентхаусни тозалашга чақиришган ва у ўзи билан челак ҳамда артишда керак бўладиган бошқа анжомларни кўтариб келган. Икки нафар йигит унга квартира бўйлаб экскурсия уюштирган, Роза тўртта ётоқхона, бир нечта ваннахона ва томдан шаҳарни томоша қилиш мумкин бўлган балкондан ҳайратга тушганини яшириб ўтирмаган.
Шундан сўнг, улар хоналарнинг бирида тўхтаган ва риэлтор шартномага имзо чекишни сўраган. «Мухлисларингиз бирлашиб, барачасини ҳал этди. Сиздан талаб қилинадиган ягона нарса — калитни олиш ва қоғозларга имзо чекиш. Энди ушбу квартира икки йилга сизнинг ихтиёрингизда», — дейди риэлтор. Шокка тушган аёл риэлторнинг сўзларига ишона олмай, йиғлаб юборган.
Воқеа Reddit тармоғида машҳурликка эришиб, 100 мингдан ортиқ лайк тўплаган. Видеога остига қолдирилган изоҳларда фойдаланувчиларнинг аксарияти инсонларнинг бу каби хатти-ҳаракатига миннатдорчилик билдирган бўлса, айримларга эса воқеа кўнгилни хижил қиладигандек туюлган. Сайт фойдаланувчиларининг таъкидлашича, улар оддий инсонлар бутун умр меҳнат қилса ҳам, шунга яраша яшай олмаслигидан хафа бўлган.
Аввалроқ Лос-Анжелесда дизайнер бошпанасиз аёлга янги квартира совға қилиб, TikTok’ни ҳайратлантиргани тўғрисида хабар берилганди.
Изоҳ (0)