Амстердамдаги тартибсизлик пайтида портлашлар юз берди

Карантин чекловлари туфайли кетма-кет тўртинчи кун тартибсизликлар давом этаётган Амстердамда бир нечта портлаш юз берди, деб ёзмоқда «РБК».

Портлашлар Нидерландия пойтахти четидаги Осдорп ҳудудида содир бўлган. Портлашларнинг бири намойишчилар томонидан ёқиб юборилган юк машинасида, бошқаси савдо дўконида юз берган.

Тартибсизликлар пайтида полиция билан тўқнашувлар содир бўлган. Айни пайтда, комендантлик соати бошланиб, ҳудуд қамал қилинган; у ерда норозилик ҳаракати деярли тўхтаган. Таъкидланишича, намойишчиларнинг сўнгги гуруҳлари хавфсизлик кучлари томонидан ўраб олинган овқатланиш шохобчасини бошпана қилган.

Миллий полиция бошлиғи Уильям Веленнинг сўзларига кўра, 26 январда тун аввалги кунларга қараганда «анча осойишта» ўтган. У ижтимоий тармоқларда кўчага чиқишга бўлган чақириқлар ҳалиям кўплигини таъкидлаган.

Эслатиб ўтамиз, Нидерландия 23 январдан бутун мамлакат бўйлаб 21:00 дан 04:30 гача амал қиладиган комендантлик соати ўрнатилиб, у 10 февралгача давом этиши белгилангач тартибсизликлар бошланган эди.

Бир нечта шаҳарларда полиция намойишчиларга қарши дубинкалар, кўзни ёшлантирувчи газ ва сув замбаракларидан фойдаланишга мажбур бўлган ҳамда расмийлар талончилик ҳолатлари ҳақида ҳам хабар берган.

25 январь куни намойишчилар автомобиль, пиёдалар кўприкларини ёқиб, дўкон ва муассасаларнинг ойналарини синдира бошлаган. Полиция билан тўқнашув пайтида намойишчилар полиция ходимларига тош ва фейерверклар улоқтирган. Ўнлаб намойишчилар ҳибсга олиниб, жаримага тортилган.

Аввалроқ Ливанда локдаунга қарши намойишчиларнинг ҳуқуқ-тартибот органлари ходимлари билан тўқнашуви содир бўлгани, беш нафар намойишчи ва уч нафар ички хавфсизлик ходими жароҳат олиб, ўнлаб одамлар ҳибсга олингани ҳақида хабар қилинганди.