Колумбия президенти Иван Дуке мамлакатда коронавирус пандемияси сабабли 51 747 кишининг вафот этгани муносабати билан уч кунлик мотам эълон қилди. Бу ҳақда унинг 26 январь кунги баёнотига асосланиб «Известия» нашри хабар берди.
«Мен COVID-19’дан вафот этган барча колумбияликларни ва мудофаа вазири Карлос Олмес Трухильони хотирлаш тўғрисида фармон имзоладим. Уч кун мотам қиламиз ва ушбу касаллик туфайли бизни тарк этганларнинг барчасига ҳурмат бажо келтирамиз», — деди Дуке.
Фармон имзоланишидан аввалроқ Колумбия мудофаа вазирлиги раҳбари Карлос Олмес Трухильо 70 ёшида коронавирус туфайли вафот этгани маълум қилинганди.
Трухилё 12 январь куни COVID-19’га тест топширган ва натижа ижобий чиққан. У даволанишни бошлаган бўлса-да, асоратлар туфайли соғлиғи ёмонлашган, шифокорлар уни сақлаб қололмаган.
Колумбияда 26 январь ҳолатига кўра 2,27 миллион киши коронавирусга чалинган, шунингдек, 1,80 миллион бемор инфекциядан тузалган, 51 747 киши вафот этган.
Аввалроқ Буюк Британия коронавирус оқибатида вафот этганлар сони 100 мингдан ошган Европадаги биринчи давлат бўлгани, АҚШда коронавирусга чалинганлар сони 24 миллион кишига етгани хабар қилинганди.
Изоҳ (0)