Янги Зеландияда икки ой ичида биринчи марта коронавирусни юқтириш ҳолати аниқланди, деб ёзади «ТАСС» COVID-19 бўйича чоралар вазири Крис Хипкинзга таяниб. Вирусга чалинган аёл Испаниядан учиб келган.
«Эҳтимолий коронавирусга чалиниш ҳолати тасдиқланди. Инфекция штамми Жанубий Африкага хос бўлиб, инфекция манбаси давлат чегара изоляторида бўлган бошқа одам бўлиши керак», — деди Хипкинз.
Унинг қўшимча қилишича, мамлакатда 21 ноябрдан буён биринчи марта қайд этилган COVID-19’га чалиниш ҳолати Янги Зеландияга Испаниядан келган 56 ёшли аёл билан боғлиқ.
Аёл Янги Зеландияга кириб келувчилар учун мажбурий карантинда вақтида, Окленд давлат чегара изоляторида вирусни юқтирган. Хипкинз таъкидлашича, беморда касаллик белгилари у карантиндан кейин уйига қайтгач пайдо бўлган.
Касалланган аёл ва унинг оиласи аъзолари айни пайтда яккалаб қўйилган.
Янги Зеландияда пандемия бошидан буён COVID-19’га чалиниш билан боғлиқ 2288 та ҳолат қайд этилган. 25 бемор вирус асоратларидан вафот этган.
24 мартдан мамлакатда қатъий эпидемик чекловлар амал қилган, улар 9 июнда тўлиқ бекор қилинган эди. Айни пайтда амалда бўлган ягона санитария чораси жамоат транспортида ва авиапарвозлар чоғида ҳимоя ниқобларини тақиш талаби ҳисобланади. Мамлакатга келган чет элликлар икки ҳафта давомида давлат карантин марказларида қолиб, коронавирусга уч марта тест топшириши шарт. Май ойида Янги Зеландияда коронавирусга қарши оммавий эмлаш бошланиши кутилмоқда.
Изоҳ (0)