Нидерландия полицияси Амстердам ва Эйндховен шаҳарларида намойишчиларни тарқатиш учун махсус воситалардан фойдаланди. Маҳаллий аҳоли коронавирусга қарши кураш учун ҳукумат томонидан жорий қилинган чора-тадбирларга қарши чиқмоқда, деб ёзади «РБК».
Полиция сув замбараклари, дубинкаларни қўллади, Эйндховенда эса кўзни ёшлантирувчи газдан ҳам фойдаланишди. Иккала шаҳардаги намойишчилар ўз навбатида, ҳуқуқ-тартибот органлари ходимларига фейерверклар ёғдирди, Эйндховенда эса одамлар куч вакиллари йўлини велосипедлардан иборат баррикадалар билан тўсишга уринди.
Норозилик акциялари учун ҳукуматдан рухсат олинмаган.
NOS нашри қайд этишича, намойишчиларнинг қувилиши оқибатида Эйндховенда оммавий тартибсизликлар юзага келди. Одамлар машиналарни ёқиб, дўконларни ўмара бошлади, маҳаллий вокзал яқинида йўл ҳаракати тўхтатиб қўйилди.
Амстердамда, полиция маълумотларига кўра, 1,5 минг киши митингга чиқди, уларнинг 100 дан ортиғи ҳибсга олинди.
Амстердамда ўтган ҳафта ҳам COVID-19 туфайли чекловларга қарши намойишлар бўлиб, улар назоратдан чиқиб кетган эди.
23 январдан Нидерландияда бутун мамлакат бўйлаб 21:00 дан 04:30 гача амал қиладиган комендантлик соати кучга кирди, у 10 февралгача давом этади.
Полиция аллақачон 3,6 минг кишини комендантлик соатини бузгани учун жаримага тортди. 25 киши қўлга олинди.
Сўнгги маълумотларга кўра, Нидерландияда касалланганлар сони 962 104 кишига етган.
Изоҳ (0)