Исроил коронавируснинг янги штаммлари тарқалишининг олдини олиш мақсадида 26 январдан 31 январга қадар барча халқаро авиақатновларни тўхтатади. Мазкур қарор мамлакат Вазирлар Маҳкамаси томонидан маъқулланган, деб ёзади «РБК».
«Биз бутун дунёдан олдиндамиз. Бирор миллат қилмоқчи бўлган ишимизни амалга оширгани йўқ — биз мамлакатни герметик ёпиб қўямиз», — дейди Исроил бош вазири Биньямин Нетаньяху ҳукумат йиғилишида.
Тақиқ хориждан амалга ошириладиган юк рейслари ва тиббий ёрдам хизматларининг парвозларига тааллуқли эмас. Исроилнинг ўзидан эса қатор сабабга кўра учиб кетиш мумкин: хорижда даволаниш, масофадан туриб бажариб бўлмайдиган иш бўйича, суд можароларида иштирок этиш учун, оила аъзоларининг дафн маросимида қатнашиш ёки кўчиб кетиш мақсадида.
Вазирлар Маҳкамасининг қарорини Кнессет (парламент) иқтисодий комиссияси ва Конституция, қонунчилик ва адолат масалалари бўйича комиссия ҳам маъқуллаши керак.
Жонс Ҳопкинс университети маълумотларига кўра, Исроилда пандемия бошланганидан буён коронавирусга чалинганлар сони 595 минг кишидан ошган, 4,3 минг одам COVID-19 қурбонига айланган.
Маълумот учун, Исроилда Pfizer вакцинаси билан оммавий эмлаш жараёнлари 20 декабрда, вакцинациянинг иккинчи дозасини қилиш эса 10 январдан бошланган эди. Аввалроқ Исроил ҳукумати коронавируснинг янги штамми туфайли хорижликларнинг мамлакатга киришини тақиқлагани, мамлакатда 27 декабрь соат 17:00 дан янги — пандемия бошидан буён учинчи карантин бошлангани ҳақида хабар берилганди.
Изоҳ (0)