Мисрда 24 январь, якшанба куни COVID-19’га қарши вакцинация бошланди, биринчи бўлиб тиббиёт ходимлари бепул эмланди, деб хабар бермоқда «Интерфакс».
«Тиббиёт ходимларининг барчаси эмланади, бу уларнинг ҳуқуқидир», — деди Миср соғлиқни сақлаш вазири Хала Зайд.
Вазирнинг сўзларига кўра, тиббиёт ходимларидан кейин кексалар ва сурункали касаллиги мавжуд беморлар эмланади. Унинг таъкидлашича, маблағи етарли фуқароларга вакцина текинга берилмайди.
Вазир, шунингдек, Қоҳиранинг Буюк Британия, Хитой ва Россия компаниялари билан тахминан 100 миллион дозадаги вакцина етказиб бериш бўйича шартномалар имзолаганини айтди.
Унинг қўшимча қилишича, Миср вакцинани тўғридан-тўғри мамлакатнинг ўзида ишлаб чиқариш ҳамда уни бошқа Африка давлатларига етказиб бериш имконияти устида ишламоқда. Вазир гап қайси вакцина ҳақида кетаётганига аниқлик киритмади.
Январь ойи бошида Қоҳира 40 миллион дозагача — асосан, AstraZeneca компанияси ишлаб чиқарган вакцина ёрдамида мамлакат аҳолисининг 20 фоизини эмламоқчилиги айтилганди.
Жонс Ҳопкинс универстети маълумотларига кўра, Мисрда пандемия бошлангандан буён жами 161 817 кишида коронавирус инфекцияси аниқланган, 8959 киши касалликдан вафот этган. 126,1 мингдан ортиқ одам соғайган.
Оммавий ахборот воситаларининг таъкидлашича, Миср Африка мамлакатлари орасида биринчилардан бўлиб COVID-19’га қарши аҳолини эмлашни бошлади. Сейшел ороллари қитъада коронавирусга қарши эмлашни бошлаган биринчи мамлакат бўлди.
Эслатиб ўтамиз, 18 январдан Россияда коронавирусга қарши оммавий эмлаш бошланган. Сингапурда эса февраль ойидан коронавирусга қарши бепул вакцинация бошланади.
Изоҳ (0)