Мексика президентида коронавирус аниқланди

Мексика президенти Андрес Мануэль Лопес Обрадор Twitter орқали ўзида коронавирус тасдиқланганини маълум қилди, деб ёзмоқда «РБК».

«Сизга COVID-19’га чалинганим тўғрисида хабар беришдан афсусдаман. Симптомлар енгил кечмоқда, даволанишни аллақчон бошлаб юборганман. Мен ҳар доимгидек некбин кайфиятдаман. Биз ортга чекинмаймиз», — деб ёзган Обрадор.

Ҳозирча давлат ишлари Ички ишлар вазирлиги раҳбари Ольга Санчес Кордеро томонидан олиб борилмоқда. Президент ишларнинг боришини Миллий саройдан кузатиб бормоқда.

Шунингдек, Обрадор 25 январь, душанба куни Россия президент Владимир Путинга қўнғироқ қилмоқчилигини айтганди. Қўнғироқ ҳақида аввалроқ Мексика ташқи ишлар вазири Марсело Эбрард хабар берганди. Унинг аниқлик киритишича, икки давлат раҳбарлари ўртасидаги суҳбатда ўзаро муносабатларнинг келажаги, шунингдек, Мексикага Россия вакцинасини етказиб бериш масалалари муҳокама қилинади.

Сентябрь ойида Россиянинг тўғридан-тўғри инвестициялар фонди (РДИФ) бош директори Кирилл Дмитриев вакцина ишлаб чиқарувчи Гамалея номидаги марказ билан ҳамкорликда Мексикага 32 миллион доза вакцина етказиб бериш режалаштирилганини айтган. Бу мамлакат аҳолисининг тўртдан бир қисмини эмлаш учун етарли бўлади.

Январь ойи бошида Мексика соғлиқни сақлаш вазирининг ўринбосари Уго Лопес-Гателль мамлакат 24 миллион доза Россия вакцинасидан фойдаланиши мумкинлигини айтганди.

Обрадор, шунингдек, хусусий компания ва ҳудудий ҳокимликларга Мексикада фойдаланиш учун чет эл вакцинасини мустақил равишда сотиб олишга рухсат берди. Рўйхатдан ўтган ёки ўтмоқчи бўлган дориларни сотиб олишга рухсат берилади.

Шундан сўнг оммавий ахборот воситалари 2 миллион доза «Спутник V» сотиб олган тадбиркор Алехандро Коссио ҳақида хабар берди. Бироқ РДИФ ушбу хабарни рад этиб, уни вакцинага қарши ишлатилган «янглиш маълумот» деб изоҳлади.

Жонс Ҳопкинс университети маълумотларига кўра, коронавирусга чалинганларнинг кўплиги бўйича Мексика дунёда 13-ўринда туради: мамлакатда 1,7 миллион одамда вирус тасдиқланган. Ўлимлар сони бўйича мамлакат 149 минг киши билан тўртинчи ўринда туради.

Эслатиб ўтамиз, 2020 йил декабрь ойида Мексиканинг Тартибга солиш агентлиги Pfizer ва BioNTech томонидан ишлаб чиқарилган COVID-19 вакцинасидан фавқулодда фойдаланишни маъқуллаган.