Meksika prezidenti Andres Manuel Lopes Obrador Twitter orqali o‘zida koronavirus tasdiqlanganini ma’lum qildi, deb yozmoqda “RBK”.
“Sizga COVID-19’ga chalinganim to‘g‘risida xabar berishdan afsusdaman. Simptomlar yengil kechmoqda, davolanishni allaqchon boshlab yuborganman. Men har doimgidek nekbin kayfiyatdaman. Biz ortga chekinmaymiz”, — deb yozgan Obrador.
Hozircha davlat ishlari Ichki ishlar vazirligi rahbari Olga Sanches Kordero tomonidan olib borilmoqda. Prezident ishlarning borishini Milliy saroydan kuzatib bormoqda.
Shuningdek, Obrador 25-yanvar, dushanba kuni Rossiya prezident Vladimir Putinga qo‘ng‘iroq qilmoqchiligini aytgandi. Qo‘ng‘iroq haqida avvalroq Meksika tashqi ishlar vaziri Marselo Ebrard xabar bergandi. Uning aniqlik kiritishicha, ikki davlat rahbarlari o‘rtasidagi suhbatda o‘zaro munosabatlarning kelajagi, shuningdek, Meksikaga Rossiya vaksinasini yetkazib berish masalalari muhokama qilinadi.
Sentabr oyida Rossiyaning to‘g‘ridan to‘g‘ri investitsiyalar fondi (RDIF) bosh direktori Kirill Dmitriyev vaksina ishlab chiqaruvchi Gamaleya nomidagi markaz bilan hamkorlikda Meksikaga 32 million doza vaksina yetkazib berish rejalashtirilganini aytgan. Bu mamlakat aholisining to‘rtdan bir qismini emlash uchun yetarli bo‘ladi.
Yanvar oyi boshida Meksika sog‘liqni saqlash vazirining o‘rinbosari Ugo Lopes-Gatell mamlakat 24 million doza Rossiya vaksinasidan foydalanishi mumkinligini aytgandi.
Obrador, shuningdek, xususiy kompaniya va hududiy hokimliklarga Meksikada foydalanish uchun chet el vaksinasini mustaqil ravishda sotib olishga ruxsat berdi. Ro‘yxatdan o‘tgan yoki o‘tmoqchi bo‘lgan dorilarni sotib olishga ruxsat beriladi.
Shundan so‘ng ommaviy axborot vositalari 2 million doza “Sputnik V” sotib olgan tadbirkor Alexandro Kossio haqida xabar berdi. Biroq RDIF ushbu xabarni rad etib, uni vaksinaga qarshi ishlatilgan “yanglish ma’lumot” deb izohladi.
Jons Hopkins universiteti ma’lumotlariga ko‘ra, koronavirusga chalinganlarning ko‘pligi bo‘yicha Meksika dunyoda 13-o‘rinda turadi: mamlakatda 1,7 million odamda virus tasdiqlangan. O‘limlar soni bo‘yicha mamlakat 149 ming kishi bilan to‘rtinchi o‘rinda turadi.
Eslatib o‘tamiz, 2020-yil dekabr oyida Meksikaning Tartibga solish agentligi Pfizer va BioNTech tomonidan ishlab chiqarilgan COVID-19 vaksinasidan favqulodda foydalanishni ma’qullagan.
Izoh (0)