Корея Халқ Демократик Республикаси (КХДР)нинг Кувайтдаги элчихонаси раҳбари вазифасини бажарувчи Рю Хён Ву Жанубий Кореяга қочиб кетди, деб хабар бермоқда «Интерфакс».
2017 йилда КХДРнинг Кувайтдаги элчиси Сео Чанг Зик БМТнинг қарори билан Кувайтдан чиқариб юборилгандан бери элчихонанинг вақтинчалик ишончли вакили бўлиб ишлаган Рю Хён Ву оиласи билан Жанубий Кореяга кетиб қолди, дейилади хабарда.
Дипломатнинг қочиб кетиши тафсилотлари очиқланмаган. Бироқ Жанубий Кореядаги баъзи маҳаллий оммавий ахборот воситалари Рю Хён Вунинг 2019 йил сентябрь ойида мамлакатга кириб келгани ҳақида хабар тарқатган.
Уларнинг таъкидлашича, Рю Хён Вуни КХДР Меҳнат партияси Марказий қўмитасининг 39-бюроси собиқ раҳбарининг куёви, собиқ раҳбар эса 2017 йилга қадар гўёки КХДР раҳбарларининг махфий жамғармаси учун масъул бўлган.
Хабарга кўра, Рю Хён Ву фарзандларининг келажаги учун жанубга қочишга қарор қилган. Жанубий Корея Миллий разведка бошқармаси вакили Рю Хён Вунинг қочиб кетиши тўғрисида изоҳ беришдан бош тортди.
Аввалроқ коронавирус туфайли Шимолий Кореядан Жанубий Кореяга қочиб ўтганлар сони кескин камайгани ҳамда Пхенянда Корея Меҳнат партиясининг VIII қурултойи якунига бағишланган ҳарбий парадда КХДР «дунёдаги энг кучли» қуролни намойиш этгани ҳақида хабар берилганди.
Изоҳ (0)