KXDRning Kuvaytdagi elchisi Janubiy Koreyaga qochib ketdi
Koreya Xalq Demokratik Respublikasi (KXDR)ning Kuvaytdagi elchixonasi rahbari vazifasini bajaruvchi Ryu Xyon Vu Janubiy Koreyaga qochib ketdi, deb xabar bermoqda “Interfaks”.
2017-yilda KXDRning Kuvaytdagi elchisi Seo Chang Zik BMTning qarori bilan Kuvaytdan chiqarib yuborilgandan beri elchixonaning vaqtinchalik ishonchli vakili bo‘lib ishlagan Ryu Xyon Vu oilasi bilan Janubiy Koreyaga ketib qoldi, deyiladi xabarda.
Diplomatning qochib ketishi tafsilotlari ochiqlanmagan. Biroq Janubiy Koreyadagi ba’zi mahalliy ommaviy axborot vositalari Ryu Xyon Vuning 2019-yil sentabr oyida mamlakatga kirib kelgani haqida xabar tarqatgan.
Ularning ta’kidlashicha, Ryu Xyon Vuni KXDR Mehnat partiyasi Markaziy qo‘mitasining 39-byurosi sobiq rahbarining kuyovi, sobiq rahbar esa 2017-yilga qadar go‘yoki KXDR rahbarlarining maxfiy jamg‘armasi uchun mas’ul bo‘lgan.
Xabarga ko‘ra, Ryu Xyon Vu farzandlarining kelajagi uchun janubga qochishga qaror qilgan. Janubiy Koreya Milliy razvedka boshqarmasi vakili Ryu Xyon Vuning qochib ketishi to‘g‘risida izoh berishdan bosh tortdi.
Avvalroq koronavirus tufayli Shimoliy Koreyadan Janubiy Koreyaga qochib o‘tganlar soni keskin kamaygani hamda Pxenyanda Koreya Mehnat partiyasining VIII qurultoyi yakuniga bag‘ishlangan harbiy paradda KXDR “dunyodagi eng kuchli” qurolni namoyish etgani haqida xabar berilgandi.
