Москвадаги «Лужники» спорт комплекси аренасида икки нафар йўловчига мўлжалланган маҳаллий ҳаво таксиларини синовдан ўтказиш бошланди, деб хабар беради Motor. «Ховер» стартапи томонидан ишланган учувчисиз бошқариладиган такси 150 метр баландликка 300 килограммгача юкни кўтаришга қодир.
Ҳозирча аэротакси очиқ конструкция ва пайвандланган металл трубалардан биорат. Ўлчами жиҳатидан у оддий автомобиль каби: узунлиги 5 метр, эни — 1,6 метр. Бу аппаратнинг стандарт автотураргоҳдан кўтарилиши ва қўнишига имкон беради. У қадар катта бўлмаган тўртта ғилдираги ёрдамида аэротакси тураргоҳда манёврларни амалга ошириши ёки гаражга кириши мумкин.
Йўловчи дронининг ҳаракатланиши мумкин бўлган максимал тезлик соатига 200 километрни ташкил этади, 300 килограммгача юк кўтара олади, бир марта қувватланиш орқали эса 100 километр масофа босишга қодир. У, шаҳар шароитида махсус фойдаланиш учун, паст шовқин чиқарувчи электродвигатель билан жиҳозланган.
Муҳандислар «Лужники»да учар прототипнинг барча тизимларининг ишини синовдан ўтказмоқда: парвозга жавобгар парраклари, горизонтал парвоз ва қўниш, парашютнинг ишлаши ва автоном тизим. Аппарат сунъий интеллектга эга бўлиб, унинг ўзи маршрутларни тузиши, парвоз хавфсизлигини назорат қилиши ва дроннинг барча кўрсаткичларини қайд этиб бориши мумкин.
Аэроотакси устида 2018 йилдан буён изланиш олиб борилмоқда. Ихтирочиларнинг синовлардан кейинги режаси ҳозирча номаълум.
Эслатиб ўтамиз, 2020 йилнинг ёзида Москвада ҳайдовчисиз бошқариладиган автомобиль аварияга учраган эди.
Изоҳ (0)